തിരുവനന്തപുരം: കോവിഡ് ബാധിച്ച് മരിച്ചവരുടെ കുടുബാംഗങ്ങൾക്ക് സുപ്രീംകോടതി വിധിയുടെ അടിസ്ഥാനത്തിൽ ധനസഹായം ലഭിക്കാനുള്ള സാധ്യതകൾ തുറന്നു കിട്ടിയെങ്കിലും സംസ്ഥാന സർക്കാർ ഒളിച്ചുകളി തുടരുകയാണെന്ന് കെപിസിസി പ്രസിഡന്റ് കെ. സുധാകരൻ. കോവിഡ് മരണം കുറച്ചു കാട്ടാനുള്ള വ്യഗ്രതയിൽ അനേകായിരം പാവപ്പെട്ടവർക്കാണ് ധനസഹായം നിഷേധിക്കുന്നതെന്നും അദ്ദേഹം പറഞ്ഞു.
കോവിഡ് മൂലകാരണമായിട്ടുള്ള എല്ലാ മരണങ്ങളും പുനഃപരിശോധിക്കുമെന്ന പ്രഖ്യാപനമാണ് സംസ്ഥാന സർക്കാരിൽ നിന്ന് ഉണ്ടാകേണ്ടത്. ഐസിഎംആറിന്റെയും ലോകാരോഗ്യസംഘടനയുടെയും മാനദണ്ഡ പ്രകാരമാണ് കേരളത്തിൽ കോവിഡ് മരണം രേഖപ്പെടുത്തുന്നത് എന്നാണ് സർക്കാരിന്റെ ഭാഷ്യം. എന്നാൽ ചികിത്സയിലിരിക്കുന്ന രോഗികളെ ഇടവേളകളിൽ കോവിഡ് ടെസ്റ്റ് നടത്തി നെഗറ്റീവായി രേഖപ്പെടുത്തുകയാണ് കേരളം ചെയ്യുന്നത്. ഇങ്ങനെയൊരു ടെസ്റ്റ് നടത്തണമെന്ന് ഐസിഎംആറോ ലോകാരോഗ്യസംഘടനയോ നിർദേശിക്കുന്നില്ല. കോവിഡിന്റെ അനന്തര ഫലമായി ന്യൂമോണിയ പോലുള്ള രോഗങ്ങൾ വന്ന് പിന്നീട് ഇവർ മരിച്ചാലും കോവിഡ് മരണമായി പരിഗണിക്കുന്നില്ല എന്നതാണ് യഥാർത്ഥ പ്രശ്നമെന്നും അദ്ദേഹം പറഞ്ഞു.
കോവിഡ് മൂലകാരണമായ എല്ലാ മരണങ്ങളും കോവിഡ് ലിസ്റ്റിൽ ഉൾപ്പെടുത്തിയാൽ മാത്രമേ അർഹരായ എല്ലാവർക്കും ധനസഹായം ലഭിക്കൂ. കോവിഡ് ലിസ്റ്റ് അടിയന്തരമായി പുനർനിർണയം നടത്തി അർഹരായവർക്ക് ധനസഹായം ലഭിക്കാൻ ദൃതഗതിയിലുള്ള നടപടി സ്വീകരിക്കണം. മരണനിരക്ക് കുറച്ചുകാട്ടി മേനി നടക്കാൻ സർക്കാർ ശ്രമിക്കുമ്പോഴും രോഗികളുടെ എണ്ണത്തിലും മരണനിരക്കിലും ടെസ്റ്റ് പോസിറ്റീവിറ്റി നിരക്കിലുമെല്ലാം മറ്റു സംസ്ഥാനങ്ങളെ അപേക്ഷിച്ച് കേരളം ഇപ്പോൾ ദയനീയാവസ്ഥയിലാണ് എന്നതാണ് വസ്തുത.
കോവിഡ് മൂലം കേരളത്തിൽ 13,235 പേർ മരിച്ചെന്നാണ് സർക്കാർ കണക്ക്. എന്നാൽ 25,000 പേരെങ്കിലും മരിച്ചിട്ടുണ്ടെന്ന് അമേരിക്കയിലെ യൂണിവേഴ്സിറ്റി ഓഫ് വാഷിംഗ്ടണിലെ ആരോഗ്യവിഭാഗമായ ഇൻസ്റ്റിറ്റ്യൂട്ട് ഓഫ് ഹെൽത്ത് മെട്രിക്സ് ആൻഡ് ഇവാലുവേഷന്റെ (ഐഎച്ച്എംഇ) റിപ്പോർട്ടിൽ പറയുന്നു. ഇന്ത്യയിലെ എല്ലാ സംസ്ഥാനങ്ങളുടെയും പ്രൊജക്ഷൻ റിപ്പോർട്ട് ഇവർ പ്രസിദ്ധീകരിച്ചിട്ടുണ്ട്. സംസ്ഥാന സർക്കാരിന്റെ കണക്ക് തെറ്റാണെന്ന് ഇതിൽ നിന്നു വ്യക്തമാണെന്നും അദ്ദേഹം പറഞ്ഞു.
സംസ്ഥാനത്ത് ബാറുകളും സർവകലാശാലകളും തുറന്നതിനെ തുടർന്ന് കോവിഡ് അതിവേഗം വ്യാപിക്കുകയാണെന്നും സർക്കാർ കണക്കുകൾ വ്യക്തമാക്കുന്നു. ജൂൺ 28ന് സർവകലാശാല പരീക്ഷകൾ തുടങ്ങുന്നതിനു മുമ്പ് രോഗികളുടെ എണ്ണം 8000-12000 ത്തിന് ഇടയിലായിരുന്നെങ്കിൽ ഇപ്പോഴത് 13,658 ആയി കുതിച്ചുയർന്നു. വിദ്യാർത്ഥികളുടെ ജീവൻ വച്ചുള്ള തീക്കളിയാണിതെന്ന് ആരോഗ്യ വിദഗ്ധർ മുന്നറിയിപ്പ് നല്കിയെങ്കിലും സർക്കാരിന് കുലുക്കമില്ലെന്നു സുധാകരൻ ചൂണ്ടിക്കാട്ടി.
content highlights:k sudhakaran allegation against state government
