കൊച്ചി: കരിപ്പൂർ സ്വർണ്ണക്കടത്ത് കേസിൽ ഡിവൈഎഫ്ഐ മുൻ നേതാവ് സജേഷിന്റെ ചോദ്യം ചെയ്യൽ പൂർത്തിയായി. രാവിലെ 11 മണിക്ക് ആരംഭിച്ച ചോദ്യം ചെയ്യൽ ഏഴ് മണിക്കൂർ നീണ്ടു. കരിപ്പൂരിലെ സ്വർണ്ണവേട്ടയുമായി ബന്ധപ്പെട്ടാണ് സജേഷിനെ ചോദ്യം ചെയ്തത്.
രാവിലെ ഏഴു മണിക്ക് ആരംഭിച്ച ചോദ്യം ചെയ്യൽ വൈകിട്ട് ഏഴ് വരെ നീണ്ടു. സമൂഹമാധ്യമങ്ങളിലൂടെയുള്ള പരിചയം മാത്രമാണ് അർജുനുമായുള്ളതെന്ന് പറഞ്ഞു. അർജുനുമായി സ്വർണ്ണക്കടത്തിലോ ക്വട്ടേഷനിലോ ബന്ധമില്ലെന്ന് സജേഷ് പറഞ്ഞെങ്കിലും മൊഴി കസ്റ്റംസ് വിശ്വാസത്തിലെടുത്തിട്ടില്ല.
അർജുന്റെ ബിനാമിയാണ് സജേഷ് എന്നാണ് കസ്റ്റംസിന്റെ സംശയം. ഇന്ന് രേഖപ്പെടുത്തിയ മൊഴി പരിശോധിച്ച ശേഷമാകും വീണ്ടും ചോദ്യം ചെയ്യണോയെന്ന് തീരുമാനിക്കുക.
അതേസമയം, കേസിലെ പ്രധാനിയായ അർജുൻ ആയങ്കിക്ക് കൊടുക്കാനാണ് സ്വർണ്ണം കൊണ്ടുവന്നതെന്ന് കേസിൽ അറസ്റ്റിലായ മുഹമ്മദ് ഷെഫീഖ് കസ്റ്റംസിന് മൊഴി നൽകി. അർജുൻ സ്വർണ്ണം വാങ്ങാനെത്തുമെന്ന് സ്വർണ്ണം തന്നു വിട്ടവർ പറഞ്ഞുവെന്നാണ് ഷെഫീഖിന്റെ മൊഴി. ഇതു സംബന്ധിച്ച് അർജുനുമായി ഇരുപത്തഞ്ചോളം ഫോൺ കോളുകൾ നടത്തിയിട്ടുണ്ടെന്നും ഷെഫീഖ് പറയുന്നു.
