തിരുവനന്തപുരം: സംസ്ഥാന സർക്കാരിനെതിരേ രൂക്ഷ വിമർശനവുമായി കെപിസിസി പ്രസിഡന്റ് കെ സുധാകരൻ. ക്വട്ടേഷൻ സംഘങ്ങളിൽ ഉൾപ്പെട്ടവരെ പാർട്ടിയിൽ പുറത്താക്കിയെന്ന് പറയുന്നത് സിപിഎമ്മിന്റെ നാടകമാണ്. കൊടി സുനിയും കിർമാണി മനോജുമെല്ലാം ഇപ്പോഴും പാർട്ടിയിലുണ്ട്. നാടകമെന്നും ജനം വിശ്വസിക്കില്ലെന്നും സിപിഎം ജനങ്ങളുടെ കണ്ണിൽ പൊടിയിടുകയാണെന്നും സുധാകരൻ ആരോപിച്ചു.
കൊടി സുനിക്കും കിർമാണി മനോജിനെതിരേ നടപടിയെടുക്കാൻ മുഖ്യമന്ത്രിയെ വെല്ലുവിളിക്കുന്നു. കണ്ണൂർ സെൻട്രൽ ജയിലിലെ സൂപ്രണ്ട് കൊടി സുനിയാണ്. ജയിലിനുള്ളിൽ കാര്യങ്ങളെല്ലാം തീരുമാനിക്കുന്നത് ഇവരുടെ സംഘമാണ്. ആരുടെ തണലിലാണ് കൊടി സുനിക്കെല്ലാം ജയിലിനുള്ളിൽ ഇത്രയധികം സൗകര്യങ്ങൾ ലഭിക്കുന്നതെന്നും സുധാകരൻ ചോദിച്ചു. ഇവരുടെയെല്ലാം കൈയിൽ സിപിഎമ്മിന്റെ ദുഷിച്ചുനാറുന്ന നിരവധി രഹസ്യങ്ങളുണ്ടെന്നും അദ്ദേഹം വ്യക്തമാക്കി.
പിണറായി വിജയനും, കോടിയേരി ബാലകൃഷ്ണനും ഇപി ജയരാജനുമാണ് ഇവരുടെയെല്ലാം റോൾ മോഡൽ. എങ്ങനെ പണമുണ്ടാക്കണമെന്ന് ഇവരാണ് ഗുണ്ടാസംഘങ്ങൾക്ക് കാണിച്ചുകൊടുക്കുന്നത്. പാർട്ടിക്കെതിരേ പ്രതികരിക്കേണ്ടി വരുമെന്ന് വെല്ലുവിളിച്ച ആകാശ് തില്ലങ്കേരിക്ക് മറുപടി പറയാൻ സിപിഎമ്മിന് ധൈര്യമില്ലെന്നും സുധാകരൻ പറഞ്ഞു.
സ്വർണക്കടത്തിൽ മുഖ്യമന്ത്രിയുടെ പങ്കിനെക്കുറിച്ച് കസ്റ്റംസ് നോട്ടീസിൽ കൃത്യമായി പറഞ്ഞിട്ടുണ്ട്. പ്രോട്ടോക്കോൾ വകുപ്പിനെ മറികടന്ന് മുഖ്യമന്ത്രിയുടെ വീട്ടിൽ ഉൾപ്പെടെ മുഖ്യമന്ത്രി യുഎഇ കോൺസൽ ജനറലുമായും സ്വപ്നയുമായും നിരവധി തവണ കൂടിക്കാഴ്ച നടത്തിയിട്ടുണ്ട്. സ്വപ്ന പറയുമ്പോൾ കോൺസൽ ജനറലിനെ എവിടെ പോയും കാണാൻ മുഖ്യമന്ത്രി തയ്യാറായി. വിയറ്റ്നാമിൽ കള്ളക്കടത്ത് നടത്തിയതിന് സ്ഥലംമാറ്റിയ കോൺസൽ ജനറിലിനെ എന്തിനാണ് കണ്ടതെന്ന് മുഖ്യമന്ത്രി ജനങ്ങളോട് വ്യക്തമാക്കണമെന്നും അദ്ദേഹം ആവശ്യപ്പെട്ടു.
കോവിഡ് സാഹചര്യത്തിൽ സംസ്ഥാനത്തെ പരീക്ഷകൾ നിർത്തിവെക്കണമെന്നും സുധാകരൻ ആവശ്യപ്പെട്ടു. രക്ഷിതാക്കളുടെയും കുട്ടികളുടെയും ആശങ്ക സർക്കാർ മനസിലാക്കണമെന്നും സുധാകരൻ പറഞ്ഞു.
കോവിഡ് ബാധിച്ച് മരിച്ചവരുടെ കുടുംബങ്ങൾക്ക് ധനസഹായം നൽകണമെന്ന സുപ്രീംകോടതി വിധി സ്വാഗതം ചെയ്യുന്നു. സംസ്ഥാനത്തെ കോവിഡ് മരണങ്ങൾ സർക്കാർ പുനപരിശോധിക്കണം. കേരളത്തിൽ കോവിഡ് മൂലം മരിച്ച ആയിരക്കണക്കിന് ആളുകളുടെ വിവരങ്ങൾ പട്ടികയിൽ ഉൾപ്പെടുത്തിയില്ല. കോവിഡ് ബാധിച്ച മരിച്ച എല്ലാവരുടെയും വിവരങ്ങൾ സർക്കാർ പട്ടികയിൽ ഉൾപ്പെടുത്തണമെന്നും സുധാകരൻ ആവശ്യപ്പെട്ടു.
content highlights;K Sudhakaran allegation against CM Pinarayi Vijayan
