തിരുവനന്തപുരം: കാസർഗോഡ് അതിർത്തിയിലെ സ്ഥലങ്ങളുടെ പേര് മാറ്റാൻ നീക്കം നടക്കുന്നുവെന്ന പ്രചാരണം അടിസ്ഥാനരഹിതമെന്ന് മുഖ്യമന്ത്രി . ഇല്ലാത്ത കാര്യം എങ്ങനെ വാർത്തയാക്കാം എന്നതിന്റെ ഉദാഹരണമാണ് ഇതെന്നും മുഖ്യമന്ത്രി പറഞ്ഞു.
അതിർത്തിയിലെ ഗ്രാമങ്ങളുടെ പേര് മാറ്റുന്നതിനെക്കുറിച്ച് സർക്കാർ ആലോചിച്ചിട്ടു പോലുമില്ല. ഇത്തരത്തിലുള്ള വാർത്തകൾ എങ്ങനെയാണ് വരുന്നതെന്ന് അറിയില്ല. നമ്മുടെ നാട്ടിൽ അനാവശ്യ പ്രശ്നം സൃഷ്ടിക്കാനുള്ള ഗൂഢോദ്ദേശത്തിന്റെ ഭാഗമാണ് പ്രചരണമെന്നും മുഖ്യമന്ത്രി പറഞ്ഞു.
മഞ്ചേശ്വരത്തെ പത്തോളം സ്ഥലങ്ങളുടെ പേരുകൾ മലയാളീകരിക്കാൻ കേരളം ഒരുക്കം നടത്തുന്നുവെന്നായിരുന്നു പ്രചാരണം. ഇതിനു പിന്നാലെ കർണ്ണാടക മുൻ മുഖ്യമന്ത്രി എച്ച് ഡി കുമാരസ്വാമി സംസ്ഥാന സർക്കാരിന് കത്ത് നൽകിയിരുന്നു.
കർണ്ണാടക സാംസ്കാരിക വകുപ്പ് മന്ത്രി അരവിന്ദ് ലിംബാവലിയും കന്നട സംഘടനകളും പേരുമാറ്റത്തിനെതിരെ രംഗത്തെത്തി. ഇതിനിടെയാണ് ഇത്തരമൊരു നീക്കം നടക്കുന്നില്ലെന്നും പ്രചാരണം വ്യാജമാണെന്നും മുഖ്യമന്ത്രി വ്യക്തമാക്കിയിരിക്കുന്നത്.
