36 വർഷത്തെ സർവീസിന് ശേഷം ജൂലൈയിൽ വിരമിക്കാനിരിക്കെയാണ് തുടർന്നുള്ള തൻ്റെ ജീവിതവും കേരളത്തിലായിരിക്കുമെന്ന് ഋഷിരാജ് സിങ് വ്യക്തമാക്കിയത്. രാജസ്ഥാൻ സ്വദേശിയായ 1985 ബാച്ചിലെ ഐപിഎസ് ഉദ്യോഗസ്ഥനാണ്. വിരമിച്ച ശേഷം കേരളത്തിൽ തുടരുമോ എന്ന കാര്യത്തിൽ തീരുമാനമെടുക്കുമെന്ന എന്നതിൽ തീരുമാനമെടുത്തിട്ടില്ലെന്നും വൈകാതെ തീരുമാനം ഉണ്ടാകുമെന്നും പല മാധ്യമങ്ങളോടും വ്യക്തമാക്കിയിരുന്നു. ഇതിന് പിന്നാലെയാണ് കേരളത്തിൽ തുടരുമെന്ന് അദ്ദേഹം വ്യക്തമാക്കിയത്.
മലയാളികളുടെ മനസിൽ ഇടം നേടിയ ചുരുക്കം ചില ഐപിഎസ് ഉദ്യോഗസ്ഥരിൽ ഏറ്റവും മുന്നിലാണ് ഋഷിരാജ് സിങ്. പ്രവർത്തന മികവിനൊപ്പം ജനകീയ വിഷയങ്ങളിൽ നടത്തിയ ഇടപെടലാണ് അദ്ദേഹത്തെ ജനകീയനാക്കിയത്. വിവാദങ്ങളിൽപ്പെട്ടപ്പോഴും മലയാള സിനിമയെയും പാട്ടുകളെയും ഇഷ്ടപ്പെട്ടിരുന്ന അദ്ദേഹം ജനങ്ങളുടെ ഇടയിൽ നിറഞ്ഞ് നിന്നു. ഗതാഗത കമ്മീഷറായിരിക്കെ റോഡപകടങ്ങൾ കുറയ്ക്കാൻ നടത്തിയ ഇടപെടലുകൾ നിർണായകമായി. ട്രാഫിക് ഐജി ആയിരിക്കെ കൈക്കൂലി വാങ്ങുന്ന ഉദ്യോഗസ്ഥരെ പിടികൂടാൻ നടത്തിയ നീക്കവും ആൻ്റി പൈറസി സെൽ തലവനായിരിക്കെ നടത്തിയ വ്യാജ സിഡി റെയ്ഡും ഋഷിരാജ് സിങിൻ്റെ സ്വീകാര്യത വർധിപ്പിച്ചു.
മൂന്നാർ ദൗത്യം വിവാദത്തിലായത് രാഷ്ട്രീയമായി ചർച്ച ചെയ്യപ്പെട്ടു. കാറിൽ പിൻ സീറ്റിൽ ഇരിക്കുന്നവർ സീറ്റ് ബെൽറ്റ് ധരിക്കണമെന്ന ഉത്തരവും 14 സെക്കൻ്റ് തുറിച്ച് നോക്കിയാൽ പെൺകുട്ടിക്ക് പരാതി നൽകാമെന്ന വാദവും ഋഷിരാജ് സിങിനെ വാർത്തകളിൽ നിറച്ചു. എന്നാലും മലയാളികൾക്കൊപ്പം നിന്ന് പിന്തുണ നേടുന്നതിൽ എന്നും വിജയിക്കാൻ അദ്ദേഹത്തിനായി.
