ബാങ്കിൽ ജോലി വാഗ്ദാനം ചെയ്ത് ഇടുക്കി സ്വദേശിനിയായ യുവതിയിൽ 3.50 ലക്ഷം രൂപയാണ് ബിനു തട്ടിയെടുത്തത്. ആറ് ലക്ഷം രൂപയോളമാണ് ഇയാൾ ആവശ്യപ്പെട്ടിരുന്നതെന്ന് യുവതി പോലീസിനോട് പറഞ്ഞു. ആദ്യഘട്ടത്തിൽ 3.50 ലക്ഷം രൂപ നൽകി. പാലാരിവട്ടത്തെ ഒരു ബാങ്ക് അക്കൗണ്ടിലേക്കാണ് പണം നിക്ഷേപിച്ചത്. പണം നൽകിയിട്ടും ജോലി സംബന്ധിച്ച വിവരങ്ങൾ ലഭ്യമാകാതെ വന്നതോടെ ഫോണിൽ ബന്ധപ്പെടാൻ ശ്രമിച്ചു.
നിരവധി പ്രാവശ്യം ഫോണിൽ വിളിച്ചെങ്കിലും കോൾ എടുക്കാതെ വന്നതോടെ യുവതി പോലീസിൽ പരാതി നൽകി. പോലീസ് കേസെടുത്തതോടെ വീട്ടിൽ നിന്നും മാറി നിന്ന ബിനുവിനെ കോട്ടയം റെയിൽവെ സ്റ്റേഷൻ പരിസരത്തുള്ള ഫ്ലാറ്റിൽ നിന്ന് പോലീസ് പിടികൂടി. പ്രതിയെ കോടതിയിൽ ഹാജരാക്കുമെന്ന് പോലീസ് വ്യക്തമാക്കി.
ബിനുവിനെതിരെ നിരവധി തട്ടിപ്പ് കേസുകൾ നിലവിലുണ്ടെന്ന് പോലീസ് വ്യക്തമാക്കുന്നുണ്ട്. കത്തോലിക്ക സഭയുടെ വിവിധ സ്ഥാപനങ്ങളിൽ എംബിബിഎസ് സീറ്റ് വാഗ്ദാനം ചെയ്ത് സാമ്പത്തിക തട്ടിപ്പ് നടത്തിയതിന് കോട്ടയം വെസ്റ്റ് പോലീസ് ഇയാളെ അറസ്റ്റ് ചെയ്തിരുന്നു. 21 ലക്ഷം രൂപയോളമാണ് ഇത്തരത്തിൽ മാത്രമായി തട്ടിയെടുത്തത്. 2010 മുതൽ സർക്കാർ സ്ഥാപനങ്ങളിലും റെയിൽവെയിലും ജോലി വാഗ്ദാനം ചെയ്ത് പണം തട്ടിയെടുത്ത സംഭവങ്ങളിലെ പ്രതിയാണ് ബിനു.
തട്ടിപ്പ് കേസുകളിൽപ്പെട്ട് ജയിലിൽ കഴിഞ്ഞ ബിനു ജാമ്യത്തിലിറങ്ങിയിട്ടും തൊഴിൽ തട്ടിപ്പ് തുടരുകയായിരുന്നു. നിലവിൽ ഇടുക്കി കഞ്ഞിക്കുഴി, കോട്ടയം വെസ്റ്റ്, കുറവിലങ്ങാട്, ചങ്ങനാശേരി, മണ്ണാർക്കാട്, എറണാകുളം സെൻട്രൽ എന്നീ പോലീസ് സ്റ്റേഷനുകളിൽ ഇയാൾക്കെതിരെ കേസുകളുണ്ട്. ചെക്ക് തട്ടിപ്പ് കേസുകളും നിലവിലുണ്ട്.
മാധ്യമ സ്ഥാപനങ്ങളുടെ പേരിൽ വ്യാജ തിരിച്ചറിയൽ കാർഡ് തയ്യാറാക്കിയും ബിനു തട്ടിപ്പ് നടത്തിയിരുന്നു. കാത്തലിക് ഫോറം പ്രിസിഡൻ്റും കേരള യുണൈറ്റഡ് ക്രിസ്ത്യൻ ഓർഗനൈസേഷൻ പിആർഒയുമായിരുന്നു ബിനു ചാനൽ ചർച്ചകളിൽ സജീവമായിരുന്നു. ഇയാൾക്കെതിരെ പരാതിയുള്ളവർ അറിയിക്കണമെന്ന് പോലീസ് വ്യക്തമാക്കി.
