തിരുവനന്തപുരം: വിഴിഞ്ഞം വെങ്ങാനൂരിൽ യുവതിയെ ഭർത്താവിന്റെ വീട്ടിൽ തീകൊളുത്തി മരിച്ച നിലയിൽ കണ്ടെത്തി. വെങ്ങാനൂർ സ്വദേശിനി അർച്ചന(24)യെയാണ് മരിച്ച നിലയിൽ കണ്ടെത്തിയത്. മരണത്തിൽ ദുരൂഹതയുണ്ടെന്ന് ബന്ധുക്കൾ ആരോപിച്ചു. ഇന്നലെ രാത്രി പതിനൊന്നോടെയാണ് സംഭവം. ഭർത്താവ് സുരേഷിനെ പോലീസ് കസ്റ്റഡിയിൽ എടുത്തു.
കട്ടച്ചൽക്കുഴിയിലെ വാടകവീട്ടിലായിരുന്നു സുരേഷും അർച്ചനയും താമസിച്ചിരുന്നത്. ഏറെ നാളായി സുരേഷും അർച്ചനയുമായി വഴക്കുണ്ടായിരുന്നെന്നും സ്ത്രീധനത്തിന്റെ പേരിൽ ഭർത്താവ് പീഡിപ്പിച്ചിരുന്നെന്നും ബന്ധുക്കൾ ആരോപിക്കുന്നു.
അർച്ചനയുടെ മൃതദേഹം തിരുവനന്തപുരം മെഡിക്കൽ കോളേജ് ആശുപത്രിയിലേക്ക് മാറ്റി. പോസ്റ്റ് മോർട്ടത്തിനു ശേഷം മൃതദേഹം ബന്ധുക്കൾക്ക് വിട്ടുനൽകും. സുരേഷിന്റെ വീട്ടുകാർ തങ്ങളോട് സത്രീധനം ആവശ്യപ്പെട്ടിരുന്നെന്ന് അർച്ചനയുടെ ബന്ധുക്കൾ പറഞ്ഞു.
ഇന്നലെ സുരേഷും അർച്ചനയും അർച്ചനയുടെ വീട്ടിൽവന്ന് മടങ്ങിപ്പോയിരുന്നു. അതിനു ശേഷമാണ് സംഭവം നടന്നിരിക്കുന്നത്. തീകൊളുത്തിയ അർച്ചനയെ സമീപത്തെ വീട്ടുകാരാണ് ആശുപത്രിയിൽ എത്തിച്ചത്. അവിടെവെച്ച് മരണം സ്ഥിരീകരിക്കുകയായിരുന്നു. ഈ സമയം സുരേഷ് അവിടെ ഉണ്ടായിരുന്നില്ല എന്നാണ് പറയുന്നത്. എന്നാൽ മകൾ ആത്മഹത്യ ചെയ്യില്ലെന്നും സുരേഷിന്റെ അറിവോടെയാണ് ഇത് സംഭവിച്ചിരിക്കുന്നതെന്ന് അർച്ചനയുടെ പിതാവ് അശോകൻ മാതൃഭൂമി ന്യൂസിനോടു പറഞ്ഞു.
അർച്ചനയും ഭർത്താവും തമ്മിൽ ഇടയ്ക്കിടയ്ക്ക് പ്രശ്നങ്ങളുണ്ടാകാറുണ്ടായിരുന്നു. സുരേഷിന്റെ അച്ഛൻ അർച്ചനയുടെ അച്ഛനോട് മൂന്നുലക്ഷം രൂപ ആവശ്യപ്പെട്ടിരുന്നതായി വിവരമുണ്ട്. വസ്തു വാങ്ങാനാണ് ഇതെന്ന് പറഞ്ഞായിരുന്നു പണം ആവശ്യപ്പെട്ടത്. പിന്നീട് പണം ആവശ്യപ്പെട്ടില്ല. എന്നാൽ ഇടയ്ക്കിടയ്ക്ക് അർച്ചനയും സുരേഷും തമ്മിൽ വഴക്കുണ്ടാകാറുണ്ടായിരുന്നു. വഴക്കിന്റെ കാരണം തങ്ങളോട് അർച്ചന പറയാറുണ്ടായിരുന്നില്ലെന്നും എല്ലാം മനസ്സിലൊതുക്കുകയായിരുന്നുവെന്നുമാണ് അർച്ചനയുടെ അച്ഛൻ പറയുന്നത്.
മകൾ ഒരിക്കലും ആത്മഹത്യ ചെയ്യില്ല- അർച്ചനയുടെ അച്ഛൻ
മകൾ ഒരിക്കലും ആത്മഹത്യ ചെയ്യില്ലെന്ന് അർച്ചനയുടെ അച്ഛൻ അശോകൻ പറഞ്ഞു. അർച്ചനയും സുരേഷും തമ്മിൽ പ്രശ്നങ്ങളുണ്ടായിരുന്നു. അതിന്റെ പേരിൽ സുരേഷ് ഇടയ്ക്കിടയ്ക്ക് പിണങ്ങിപ്പോകാറുണ്ടായിരുന്നു. ഒന്നും രണ്ടും ദിവസം കഴിഞ്ഞാണ് മടങ്ങി വരാറ്. വിളിക്കുമ്പോൾ ഫോൺ സ്വിച്ച് ഓഫ് ആയിരിക്കും. സുരേഷിന്റെ വീട്ടുകാരുടെ അറിവോടു കൂടിയാണ് പോയതെങ്കിൽ കൂടിയും എവിടെയാണ് ഉള്ളതെന്ന് അവർ പറയില്ല. പലയിടത്തും തിരക്കിയാണ് എവിടെയാണ് ഉള്ളതെന്ന് കണ്ടെത്തുകയെന്നും അശോകൻ കൂട്ടിച്ചേർത്തു.
അർച്ചന മരിക്കുന്നതിന് തലേദിവസം സുരേഷിനൊപ്പം വീട്ടിൽ വന്നിരുന്നു. അന്ന് സുരേഷിന്റെ കയ്യിൽ ഒരു ലിറ്ററിന്റെ കുപ്പിയിൽ ഡീസലുണ്ടായിരുന്നു. എന്തിനാണ് ഇത് എന്ന് ചോദിച്ചപ്പോൾ വീട്ടിൽ ഉറുമ്പായതുകൊണ്ടാണ് എന്ന് മറുപടി നൽകി. ഉപ്പോ മഞ്ഞൾപ്പൊടിയോ ഇട്ടാൽ പോരെയെന്ന് ചോദിച്ചപ്പോൾ അവയെന്നും ഇട്ടിട്ട് പോകുന്നില്ല എന്നായിരുന്നു സുരേഷ് മറുപടി നൽകിയതെന്നും അശോകൻ പറഞ്ഞു. അർച്ചനയുടെയും സുരേഷിന്റെയും പ്രണയവിവാഹമായിരുന്നു. തമ്മിൽ പ്രശ്നങ്ങളൊന്നുമില്ലെന്ന് അർച്ചനയും സുരേഷും അഭിനയിക്കുകയായിരുന്നുവെന്നും അദ്ദേഹം പറഞ്ഞു. നഴ്സിങ് പഠനം പൂർത്തിയാക്കിയെങ്കിലും അർച്ചനയെ സുരേഷ് ജോലിക്ക് വിട്ടിരുന്നില്ലെന്നും അശോകൻ പറഞ്ഞു.
content highlights:woman found dead with burn injuries in thiruvananthapuram
