കൊച്ചി: സംസ്ഥാന ബിജെപിയുടെ സമീപകാല പ്രവർത്തനങ്ങളിൽ കടുത്ത വിമർശവുമായി ആർഎസ്എസ്. നിയമസഭാ തിരഞ്ഞെടുപ്പ് പ്രവർത്തനത്തിൽ ഏകോപനം അടക്കം പാളിയെന്നും നേതാക്കൾ ഗ്രൂപ്പിസത്തിന്റെ പിടിയിലാണെന്നും ആർഎസ്എസ് നേതൃത്വം ആക്ഷേപിച്ചു. കൊച്ചിയിൽ നടന്ന ബിജെപി-ആർഎസ്എസ് നേതൃയോഗത്തിലാണ് വിമർശനം
നിയമസഭാ തിരഞ്ഞെടുപ്പ് പരാജയം, കൊടകര കുഴൽപ്പണ വിവാദം ഉൾപ്പെടെയുള്ള വിഷയങ്ങളിൽ പാർട്ടിയിൽ പൊട്ടിത്തെറി രൂക്ഷമായതോടെ ബിജെപി സംസ്ഥാന കോർകമ്മിറ്റി ചേർന്ന് സംഘടനാ വിഷയങ്ങൾ വിശദമായി ചർച്ച ചെയ്തിരുന്നു. ഇതിന് പിന്നാലെയാണ് ബിജെപി-ആർഎസ്എസ് നേതൃയോഗം കൊച്ചിയിൽ ചേർന്നത്.
തിരഞ്ഞെടുപ്പ് വേളയിൽ കേന്ദ്രസർക്കാരിന്റെ നേട്ടങ്ങൾ ഉൾപ്പെടെ ജനങ്ങളിൽ എത്തിക്കുന്ന തരത്തിൽ ശക്തമായ പ്രചാരണം ബിജെപിക്ക് സംഘടിപ്പിക്കാനായില്ല. സ്ഥാനാർഥി നിർണയവുമായി ബന്ധപ്പെട്ട അനാവശ്യ തർക്കങ്ങളും വീഴ്ചകളും കോട്ടമുണ്ടാക്കി. പാർട്ടിയിലെ പ്രശ്നങ്ങൾക്ക് അടിസ്ഥാന കാരണമായി പലഘട്ടങ്ങളിലും ഉയർന്നുവന്നത് നേതാക്കളുടെ വിഭഗീയതയാണെന്നും ആർഎസ്എസ് വിമർശിച്ചു. അതിനാൽ ഒറ്റക്കെട്ടായി മുന്നോട്ടുപോകാനാണ് നിർദേശം.
ഗ്രൂപ്പിസത്തിനെതിരേ പലകുറി നിലപാടെടുത്തിട്ടും മാറ്റമുണ്ടാകാത്തതിലുള്ള നീരസവും സംഘ നേതൃത്വം പ്രകടിപ്പിച്ചു. ഈ സാഹചര്യത്തിൽ ബിജെപിയുടെ സംഘടനാ സംവിധാനത്തിൽ കൂടുതൽ ഇടപെടലുകൾ ആവശ്യമാണെന്നാണ് ആർഎസ്എസ് നിലപാട്. ഇതിന്റെ ഭാഗമായി പാർട്ടിയിൽ സംഘടനാ ഓഡിറ്റിങ് ഉണ്ടാകും.
നേതാക്കളുടെ പ്രവർത്തനങ്ങൾ വിലയിരുത്തുന്ന സംവിധാനം രൂപീകരിക്കാനാണ് നീക്കം. സാമ്പത്തിക കാര്യങ്ങളിലും പരിശോധനാ സംവിധാനം ഉണ്ടായേക്കും. വിവിധ പരിവാർ സംഘടനകളുടെ ആവശ്യംകൂടി പരിഗണിച്ചാണ് ആർഎസ്എസ് ഇതു നടപ്പാക്കാൻ ഉദ്ദേശിക്കുന്നത്. മുമ്പ് ജനസംഘത്തിന്റെ കാലഘട്ടത്തിൽ ഇത്തരമൊരു ഓഡിറ്റിങ് സംവിധാനമുണ്ടായിരുന്നു.
content highlights:RSS, kerala BJP, kerala elections
