തിരുവനന്തപുരം: ഐഎസിൽ ചേർന്ന് അഫ്ഗാൻ ജയിലിലായ മലയാളികളുടെ കാര്യത്തിൽ സംസ്ഥാനത്തിന് പ്രത്യേകിച്ച് ഒന്നും ചെയ്യാനില്ലെന്ന് മുഖ്യമന്ത്രി . യുവതികളെ തിരികെ കൊണ്ടുവരേണ്ടതില്ലെന്ന കേന്ദ്രസർക്കാരിന്റെ തീരുമാനത്തോടുള്ള സംസ്ഥാന സർക്കാരിന്റെ നിലപാട് എന്താണെന്ന ചോദ്യത്തിനാണ് മുഖ്യമന്ത്രിയുടെ പ്രതികരണം.
വിഷയത്തിൽ യഥാർത്ഥ നിലപാട് സ്വീകരിക്കേണ്ടത് കേന്ദ്രസർക്കാരാണ്. രാജ്യത്തിന്റെ പ്രശ്നമാണ്. കേന്ദ്രമാണ് നിലപാട് സ്വീകരിക്കേണ്ടത്. ഈ പറയുന്ന ആളുകൾ അവിടുത്തെ ജയിലിലാണ്. അവർ ഇവിടേക്ക് മടങ്ങി വരാൻ തയ്യാറാണോയെന്ന് അറിയേണ്ടതുണ്ട്. കുടുംബത്തിന്റെ അഭിപ്രായവും അറിയാൻ തയ്യാറാകണം. അങ്ങനെ പൊതുവായ നിലപാട് സ്വീകരിക്കുകയാണ് വേണ്ടത്.
വിഷയത്തിൽ സംസ്ഥാന സർക്കാരിന് ഒന്നും ചെയ്യാനില്ല. നടപടി സ്വീകരിക്കേണ്ടത് കേന്ദ്രമാണ്. കേന്ദ്രം ഇക്കാര്യങ്ങളെല്ലാം പരിശോധിച്ചുകൊണ്ടായിരിക്കണം നിലപാട് സ്വീകരിക്കേണ്ടതെന്നും മുഖ്യമന്ത്രി വ്യക്തമാക്കി.
സോണിയ സെബാസ്റ്റ്യൻ (ആയിഷ), റഫീല, മെറിൻ ജേക്കബ് (മറിയം), നിമിഷ (ഫാത്തിമ ഈസ) എന്നിവരാണ് അഫ്ഗാനിലെ ജയിലിൽ കഴിയുന്നത്. ഐഎസിൽ ചേരാൻ ഭർത്താക്കന്മാരോടൊപ്പം അഫ്ഗാനിസ്ഥാനിൽ എത്തിയവരാണ് ഇവർ.
