തിരുവനന്തപുരം
കുഴൽപ്പണ കോഴ കേസുകളിൽപെട്ട് നട്ടംതിരിയുന്ന ബിജെപിയുടെ നാണക്കേട് മറയ്ക്കാൻ കേന്ദ്ര സർക്കാരിനെ ഇടപെടുത്തി ‘വലിയ വിഷയങ്ങൾ’ സൃഷ്ടിക്കാൻ നീക്കം. സർക്കാരിനും സിപിഐ എമ്മിനും എതിരെ വീണ്ടും കേന്ദ്ര ഏജൻസികളെ ഇറക്കിയും അക്രമസമരം നടത്തിയും കളംമാറ്റാനാണ് ശ്രമം.
കെ സുരേന്ദ്രന്റെ കോഴ, കുഴൽപ്പണ കേസുകൾ ബിജെപിക്ക് ദേശീയതലത്തിൽത്തന്നെ അപമാനമുണ്ടാക്കിയെന്നാണ് കേന്ദ്ര നേതാക്കളുടെ വിലയിരുത്തൽ. എന്ത് വില കൊടുത്തും അന്തരീക്ഷം മാറ്റാനാണ് ആർഎസ്എസ് തീരുമാനം. വി മുരളീധരന്റെ ചില ഫെയ്സ്ബുക് പോസ്റ്റുകളിലും കെ സുരേന്ദ്രന്റെ വ്യാഴാഴ്ചത്തെ തൃശൂർ പ്രസംഗത്തിലുമടക്കം കേരളത്തിനെതിരെ ഉയർത്തിക്കൊണ്ടുവരുന്ന വ്യാജ പ്രചാരണങ്ങൾ വ്യക്തം. കേരളത്തിലാകെ വനംകൊള്ള നടക്കുന്നെന്നും ഇത് രാഷ്ട്രീയ നേതാക്കളുടെ ഒത്താശയോടെ ചെയ്യുന്നതാണെന്നുമാണ് വ്യാജപ്രചാരണം. ഇതിൽ കേന്ദ്ര ഇടപെടലുണ്ടാക്കാനാണ് ഇപ്പോഴത്തെ ശ്രമം.
നിയമസഭ നിരന്തരമായി നരേന്ദ്ര മോഡിക്കെതിരെ പ്രമേയങ്ങൾ പാസാക്കുകയാണ് എന്നാണ് കേന്ദ്ര നേതാക്കളെ സംസ്ഥാന നേതാക്കൾ ധരിപ്പിച്ചിട്ടുള്ളത്. അതുവഴി കേരളത്തിനെതിരെ പ്രകോപനമുണ്ടാക്കലും ലക്ഷ്യമാണ്. കൊടകര കുഴൽപ്പണ കേസിൽ ജിഹാദി ബന്ധം ഇപ്പോൾ ആരോപിക്കുന്നത് എൻഐഎപോലുള്ള കേന്ദ്ര ഏജൻസികളുടെ ഇടപെടലിനാണ്. അതുവഴി പണ കടത്തിൽ പങ്കുള്ള ബിജെപി നേതാക്കൾക്ക് തടിയൂരാനുമാണ്.
കലാപാഹ്വാനം പ്രകടം
സർക്കാർ വേട്ടയാടുന്നെന്നു പറഞ്ഞ് പ്രക്ഷോഭം നടത്തി പ്രശ്നങ്ങളുണ്ടാക്കാനും ബിജെപിയിൽ നീക്കമുണ്ട്. ആർഎസ്എസാണ് ഇതിന് നിർദേശം നൽകിയത്. കഴിഞ്ഞ ദിവസം പാർടിയിലെ പ്രമുഖരെ പങ്കെടുപ്പിച്ച് നടത്തിയ ക്ലബ്ഹൗസ് ചർച്ചയിലും ഈ ആഹ്വാനം മുഴങ്ങി. നരേന്ദ്ര മോഡി ഗുജറാത്തിൽ കളിച്ച കളികൾ ഇവിടെ ആവർത്തിക്കണമെന്നുവരെ ആർഎസ്എസ് ബുദ്ധിജീവികൾ ഉപദേശിച്ചു. അതിൽ പങ്കെടുത്ത ബിജെപി നേതാക്കൾതന്നെയാണ് സന്ദേശം ചോർത്തിയത്.
