ലൂഡോ ഗെയ്മിനെ ചുറ്റിപ്പറ്റിയുള്ള ഏറ്റവും പുതിയ വാർത്ത ഗെയിം കളിക്കുന്നവർ കഴിവ് കൊണ്ടാണോ അതോ ഭാഗ്യം മൂലമാണോ വിജയിക്കുന്നത് എന്ന് മുംബൈ ഹൈക്കോടതി വിധി പറയും എന്നതാണ്. ഓൺലൈൻ ലൂഡോ ഗെയിം ആയ ‘ലൂഡോ സുപ്രീം’ എതിരായി കേസ് വന്നതോടെയാണ് കളി ജയിക്കുന്നത് കഴിവോ? ഭാഗ്യമോ? എന്ന ചോദ്യം ഉയർന്നത്. ലൂഡോ സുപ്രീം ഗെയിം ഉടമകളായ കാഷ്ഗ്രെയിൽ പ്രൈവറ്റ് ലിമിറ്റഡിനെതിരായി സമർപ്പിച്ചിരിക്കുന്ന പരാതിയിൽ ലൂഡോ ഗെയിം കളിച്ച് ജയിക്കുന്നത് ഭാഗ്യം എന്നാണ് എങ്കിൽ അത് ചൂതാട്ടത്തിന്റെ പരിധിയിൽ വരും എന്നും നിരോധിക്കണം എന്നാണ് ആവശ്യം.
ജഡ്ജിമാരായ അഭയ് ആനന്ദ്, എസ്എസ് ഷിൻഡെ എന്നിവർ ലൂഡോ കളി ജയിക്കുന്നത് കഴിവോ? ഭാഗ്യമോ? എന്ന കാര്യത്തിൽ മഹാരാഷ്ട്ര ഗവൺമെന്റിനോട് അഭിപ്രായം ആരാഞ്ഞതായി ബാർ ആൻഡ് ബെഞ്ച് റിപ്പോർട്ട് ചെയ്യുന്നു. സർക്കാരിന്റെ ഭാഗത്തുനിന്നുള്ള വിശദീകരണത്തിന്റെ അടിസ്ഥാനത്തിലാവും കോടതി തീരുമാനമെടുക്കുക.
അതെ സമയം ഇത്തരം കാര്യങ്ങളിൽ കോടതി തങ്ങളുടെ സമയം ചിലവിടുന്നതിനെ വിമർശിച്ച് ധാരാളം പേരാണ് സമൂഹമാധ്യമങ്ങളിൽ എത്തിയിരിക്കുന്നത്. 4.64 ലക്ഷത്തോളം കേസുകൾ ഇനിയും എടുക്കാത്ത ബോംബെ ഹൈകോടതിയിലാണ് ‘ലൂഡോ കളി ജയിക്കുന്നത് കഴിവോ? ഭാഗ്യമോ?’ എന്ന കേസും വിധിപറയാൻ ഇരിക്കുന്ന ജഡ്ജിയും എന്നതാണ് പലരെയും ചൊടിപ്പിച്ചിരിക്കുന്നത്. മറ്റുള്ള പ്രധാനപ്പെട്ട കേസുകളെല്ലാം മാറ്റിവച്ച് ഇതാണോ ഇത്ര അടിയന്തിരമായി കോടതി പരിശോധിക്കുന്നത് എന്നാണ് പലരുടെയും ചോദ്യം.
