അയിലൂരിലാണ് അവിശ്വസനീയമായ സംഭവം നടന്നിരിക്കുന്നത്. 2010 ഫെബ്രുവരിയിലാണ് യുവതിയെ കാണാതാകുന്നത്. അയിലൂർ കാരക്കാട്ട് പറമ്പ് സ്വദേശിയായ യുവതിയെ കാണാനില്ലെന്ന് വീട്ടുകാർ പരാതി നൽകി. അന്ന് യുവാവിനെ ഉൾപ്പെടെയുള്ളവരെ ചോദ്യം ചെയ്തിരുന്നെങ്കിലും പോലീസിന് വിവരങ്ങളൊന്നും ലഭിച്ചില്ല.
2021 മാർച്ച് മൂന്നാം തിയ്യതി വരെയാണ് യുവാവിന്റെ വീട്ടിൽ യുവതി ഒളിവിൽ പാർത്തത്. ചെറിയ വീട്ടിലെ ശൗചാലയം പോലുമില്ലാത്ത മുറിയിലാണ് യുവതി കഴിഞ്ഞിരുന്നത്. വീട്ടിലുള്ള അച്ഛൻ,അമ്മ, സഹോദരി എന്നിവ‍ര്‍ അറിയാതെയാണ് ഭക്ഷണവും മറ്റും എത്തിച്ചു നൽകിയിരുന്നത്. മുറി പുറത്തു നിന്നും പൂട്ടിയ ശേഷമാണ് യുവാവ് പുറത്ത് പോയിരുന്നത്. ജനാലകളുടെ പലക നീക്കിയാൽ പുറത്തുകടക്കാൻ പാകത്തിൽ സൗകര്യം ഒരുക്കിയിരുന്നു.
രാത്രി വീട്ടുകാ‍ര്‍ അറിയാതെയാണ് ശൗചാലയത്തിൽ പോയിരുന്നതെന്ന് ഇരുവരും പോലീസിൽ മൊഴി നൽകി. കഴിഞ്ഞ മാ‍ര്‍ച്ച് മൂന്നിന് യുവാവിനെ കാണാതായതായി വീട്ടുകാ‍ര്‍ പരാതി നൽകിയെങ്കിലും കാണ്ടെത്താൻ കഴിഞ്ഞിരുന്നില്ല. ഇതിനിടെ ചൊവ്വാഴ്ച യുവാവിനെ നെന്മാറ കവലയിൽ വെച്ച് സഹോദരൻ കണ്ടതോടെ പോലീസിൽ വിവരം അറിയിക്കുകയായിരുന്നു, മാതൃഭൂമി റിപ്പോ‍ര്‍ട്ട് ചെയ്തു.
തുട‍ര്‍ന്ന് നടത്തിയ അന്വേഷണത്തിലാണ് വിത്തനശേരിയിലെ വാടക വീട്ടിൽ ഇരുവരേയും കണ്ടെത്തിയത്. പ്രായപൂ‍ര്‍ത്തിയായ തങ്ങൾ ഒരുമിച്ച് ജീവിക്കുകയാണെന്നാണ് ഇരുവരും മൊഴി നൽകിയതെന്ന് നെന്മാറ സിഐ എ ദീപകുമാ‍ര്‍ പറഞ്ഞു. ഇരുവരേയും കോടതിയിൽ ഹാജരാക്കിയ ശേഷം വിട്ടയച്ചു.
