കോൺഗ്രസ് ശക്തമായി തിരികെ വരുമെന്ന് സുധാകരൻ പറഞ്ഞു. ജനവിശ്വാസമുള്ള, പാർട്ടിയോട് കൂറു പുലർത്തുന്ന നേതാക്കളെ കണ്ടെത്തി നേതൃസ്ഥാനത്തേക്ക് കൊണ്ടുവരും. പ്രശ്നങ്ങളുണ്ടെങ്കിൽ പരിഹരിക്കുമെന്നും നേതാക്കളെ നേരിൽ കാണുമെന്നും കെ സുധാകരൻ പറഞ്ഞു.
കെ എസ് യു താലൂക്ക് പ്രസിഡന്റായാണ് രാഷ്ട്രീയ പ്രവർത്തനങ്ങളുടെ തുടക്കം. സംഘടനാ കോൺഗ്രസിലും ജനതാ പാർട്ടിയിലും പ്രവർത്തിച്ചെങ്കിലും കോൺഗ്രസിലേക്ക് മടങ്ങിയെത്തി. 1996 മുതൽ 2006 വരെ തുടർച്ചയായി മൂന്നു തവണ വിജയിച്ചു. 1980ലും 82,91 വർഷങ്ങളിൽ എടക്കാടു നിന്നും പരാജയപ്പെട്ടു.
2001ൽ ആന്റണി മന്ത്രിസഭയിൽ വനം-കായിക വകുപ്പ് മന്ത്രിയായിരുന്നു. 2009ൽ ലോക്സഭയിലേക്ക് കണ്ണൂരു നിന്നും മത്സരിച്ചു. കന്നിയങ്കത്തിൽ തന്നെ വിജയം. ഇടതുപക്ഷത്തു നിന്നും മണ്ഡലം പിടിച്ചെടുത്തു.
2014ൽ ലോക്സഭയിലേക്കും 2016ൽ നിയമസഭയിലേക്കും മത്സരിച്ച് പരാജയപ്പെട്ടു. പിന്നീട് 2019ൽ ലോക്സഭയിലേക്ക് കണ്ണൂരു നിന്നും തെരഞ്ഞെടുക്കപ്പെട്ടു.
തെരഞ്ഞെടുപ്പുകാലത്ത് മുഖ്യമന്ത്രി പിണറായി വിജയനെതിരെ കെ സുധാകരൻ നടത്തിയ ജാതീയ പരാമർശം വിവാദമായിരുന്നു. ചെത്തുകാരന്റെ കുടുംബത്തിൽ പിറന്ന പിണറായി വിജയൻ സഞ്ചരിക്കാൻ ഹെലികോപ്റ്റർ വാങ്ങിയെന്നായിരുന്നു പരാമർശം. തലശേരിയിൽ നടന്ന രാഷ്ട്രീയ വിശദീകരണ യോഗത്തിലായിരുന്നു പരാമർശം. കടുന്ന വിമർശനം ഉയർന്നെങ്കിലും തിരുത്താൻ സുധാകരൻ തയ്യാറായിരുന്നില്ല.
