സംഭവത്തിൽ ബദിയടുക്ക പോലീസ് ഇന്നലെ കേസ് രജിസ്റ്റർ ചെയ്തിരുന്നു. കോടതിയുടെ അനുമതിയോടെയാണ് 171 ബി വകുപ്പ് അനുസരിച്ച് സുരേന്ദ്രനെതിരെ കേസെടുത്തിരിക്കുന്നത്. ആരോപണങ്ങളുടെ അടിസ്ഥാനത്തിൽ മുഖ്യ തെരഞ്ഞെടുപ്പ് കമ്മീഷൻ ടിക്കാറാം മീണ റിപ്പോർട്ട് തേടിയിട്ടുണ്ട്.
തെരഞ്ഞെടുപ്പ് കൈക്കൂലി സംബന്ധിച്ച പരാതിയിൽ സംസ്ഥാന പോലീസ് മേധാവിയിൽ നിന്നും ജില്ലാ കളക്ടറിൽ നിന്നും റിപ്പോർട്ട് തേടിയതായി മുഖ്യ തെരഞ്ഞെടുപ്പ് ഓഫീസർ ടിക്കാറാം മീണ പറഞ്ഞു. വിഷയത്തിൽ മുഖ്യ തെരഞ്ഞെടുപ്പ് കമ്മീഷനുമായി ചർച്ച ചെയ്ത് തുടർനടപടി തീരുമാനിക്കുമെന്നും അദ്ദേഹം പറഞ്ഞു. തെരഞ്ഞെടുപ്പ് കൈക്കൂലി കേസ് തെളിഞ്ഞാൽ ആറ് വർഷം വരെ തെരഞ്ഞെടുപ്പിൽ മത്സരിക്കുന്നതിൽ നിന്നും വിലക്ക് ഏർപ്പെടുത്തുമെന്നും അദ്ദേഹം വ്യക്തമാക്കി.
കെ സുന്ദരയുടെ മൊഴിയുടെ അടിസ്ഥാനത്തിൽ ബിജെപി പ്രാദേശിക നേതാക്കളെ പ്രതി ചേർത്തേക്കും. ഇവർക്കെതിരെ ക്രമിനിൽ കേസ് ചുമത്താനാണ് നീക്കം. തട്ടിക്കൊണ്ടു പോയി ഭീഷണിപ്പെടുത്തൽ, പട്ടിക വർഗ്ഗ പീഡന നിരോധന വകുപ്പുകൾ അടക്കമുള്ളവ പ്രതികൾക്കെതിരെ ചുമത്തിയേക്കും. കേസിൽ സുനിൽ നായ്ക്ക് അടക്കമുള്ളവരെ പ്രതി ചേർത്തേക്കുമെന്ന് ഏഷ്യാനെറ്റ് ന്യൂസ് റിപ്പോർട്ട് ചെയ്തു.
എഫ്ഐആറിൽ പറയുന്നതു പ്രകാരം നിലവിൽ കെ സുരേന്ദ്രനെതിരെ മാത്രമാണ് കേസെടുത്തിരിക്കുന്നത്. പത്രിക പിൻവലിക്കാൻ ആവശ്യപ്പെട്ട് ബിജെപി നേതാക്കൾ തന്നെ തട്ടിക്കൊണ്ടു പോയതായും ഭീഷണിപ്പെടുത്തിയതായും കെ സുന്ദര പോലീസിന് മൊഴി നൽകിയിട്ടുണ്ട്. സുന്ദരയുടെ മൊഴി അനുസരിച്ച് പണം നൽകാനെത്തിയ സുനിൽ നായ്ക്ക്, സുരേഷ് നായ്ക്ക്, അശോക് ഷെട്ടി എന്നിവരേയും പ്രതി ചേർത്തേക്കും.
