നിയമസഭാ തെരഞ്ഞെടുപ്പിൽ 35 സീറ്റുകളിൽ വരെ ബിജെപി വിജയിക്കുമെന്നും കേവലഭൂരിപക്ഷമില്ലാതെ അധികാരത്തിൽ വരുമെന്നുമായിരുന്നു കെ സുരേന്ദ്രൻ ആവര്‍ത്തിച്ചു പറഞ്ഞിരുന്നത്. എന്നാൽ ബിജെപിയ്ക്ക് കൈവശമുണ്ടായിരുന്ന ഒരേയൊരു സീറ്റ് കൂടി നഷ്ടപ്പെട്ടതിനു പുറമെ നാലര ലക്ഷത്തോളം വോട്ടിൻ്റെ കുറവുമുണ്ടായി. എന്നാൽ നിയമസഭാ തെരഞ്ഞെടുപ്പ് പ്രചാരണത്തിൻ്റെ ഫണ്ട് കൈകാര്യം ചെയ്യാൻ പ്രത്യേകം സമിതി രൂപീകരിക്കാതെ സംസ്ഥാന അധ്യക്ഷനും സെക്രട്ടറിയും കേന്ദ്രമന്ത്രിയും ചേര്‍ന്ന അനൗദ്യോഗിക സംഘമാണ് ഫണ്ട് കൈര്യം ചെയ്തിരുന്നതെന്ന ആരോപണവും പാര്‍ട്ടിയ്ക്കുള്ളിൽ ഉയര്‍ന്നിരുന്നു. ഇതിനു പിന്നാലെയാണ് കുഴൽപ്പണക്കേസിൽ പാര്‍ട്ടിയുടെ മുതിര്‍ന്ന നേതാക്കളെ പോലീസ് ചോദ്യം ചെയ്യുന്നത്.
Also Read:
കുഴൽപ്പണവുമായി ബിജെപിയ്ക്ക് ബന്ധമില്ലെന്നും ബിജെപി നേതാക്കളെ പോലീസ് അനാവശ്യമായി ചോദ്യം ചെയ്യുകയാണെന്നുമാണ് കെ സുരേന്ദ്രൻ ഇന്നലെ വാര്‍ത്താ സമ്മേളനത്തിൽ പറഞ്ഞത്. എന്നാൽ കര്‍ണാടകയിൽ നിന്നു കൊണ്ടുവന്നു കൊടകരയിൽ വെച്ചു കവര്‍ച്ച ചെയ്യപ്പെട്ട മൂന്നരക്കോടിയോളം വരുന്ന കുഴൽപ്പണം ബിജെപിയുടെ തെരഞ്ഞെടുപ്പ് ഫണ്ട് തന്നെയാണെന്ന് അന്വേഷണസംഘം പറയുന്നു. ആലപ്പുഴയിലെ ബിജെപി നേതാക്കള്‍ക്ക് കൈമാറാനായി കൊണ്ടുപോയതാണ് പണം എന്നാണ് പോലീസ് പറയുന്നത്.
ഇതിനു പിന്നാലെ സികെ ജാനുവിന് 10 ലക്ഷം രൂപ കൈമാറിയെന്ന ആരോപണവും വലിയ വിവാദമായിട്ടുണ്ട്. ഇതു സംബന്ധിച്ച് പുറത്തു വന്ന ശബ്ദരേഖ പൂര്‍ണമായി നിഷേധിക്കാൻ സുരേന്ദ്രൻ തയ്യാറായിരുന്നില്ല.
Also Read:
പാലക്കാട് ബിജെപി സ്ഥാനാര്‍ഥിയായിരുന്ന ഇ ശ്രീധരനെ തോൽപ്പിക്കാൻ ബിജെപി സംസ്ഥാന നേതാക്കളും എതിര്‍സ്ഥാനാര്‍ഥിയും തമ്മിൽ ഒത്തുകളിച്ചെന്ന ആരോപണവും ഇതിനിടെ പുറത്തു വന്നിട്ടുണ്ട്. ശ്രീധരനു പ്രതീക്ഷിച്ച വോട്ട് കിട്ടാത്തതിനു പിന്നിൽ ബിജെപി നേതാക്കളുടെ ഡീൽ ആണെന്നാണ് കേന്ദ്രനേതൃത്വത്തിനു ലഭിച്ചിരിക്കുന്ന പരാതി.
സുരേന്ദ്രനായിരുന്നു പാര്‍ട്ടി ഫണ്ട് കൈകാര്യം ചെയ്തിരുന്നതെന്ന് മൂന്നുപേര്‍ മൊഴി നല്‍കിയതിൻ്റെ അടിസ്ഥാനത്തിലാണ് അദ്ദേഹത്തെ ചോദ്യം ചെയ്യുന്നത്. വിവിധ മണ്ഡലങ്ങളിലേയ്ക്കു നല്‍കാനുള്ള തുകയുടെ കാര്യത്തിൽ തീരുമാനമെടുത്തിരുന്നതും സുരേന്ദ്രനായിരുന്നു. അതേസമയം, ചോദ്യം ചെയ്യലിനായി സുരേന്ദ്രന് അന്വേഷണസംഘം ഇതുവരെ നോട്ടീസ് നല്‍കിയിട്ടില്ല.
