വികസനത്തിന് ഊന്നൽ നൽകിയുള്ളതാകും ബജറ്റെന്ന സൂചനയാണ് ധനമന്ത്രി നൽകുന്നത്. ‘2021-22 വർഷത്തേക്കുള്ള പുതുക്കിയ സംസ്ഥാന ബജറ്റ് ഇന്ന് നിയമസഭയിൽ അവതരിപ്പിക്കുകയാണ്. കേരളത്തിന്‍റെ ഭാവി വികസനത്തിന് ഈ ബജറ്റ് സഹായകരമാകുമെന്നാണ് പ്രതീക്ഷ’യെന്ന് കെഎൻ ബാലഗോപാൽ ഫേസ്ബുക്കിൽ കുറിച്ചു.
കൊവിഡ് പ്രതിരോധത്തിന് ഊന്നൽ നൽകിയുള്ളതാകും ബജറ്റെന്നാണ് പ്രതീക്ഷിക്കുന്നത്. ഈ വർഷം തോമസ് ഐസക്ക് അവതരിപ്പിച്ച ബജറ്റിന്‍റെ തുടർച്ചയാണെങ്കിലും പുതിയ പ്രഖ്യാപനങ്ങൾ കൂടി ഉണ്ടാകുമെന്നാണ് പ്രതീക്ഷിക്കുന്നത്.
ജനുവരിയില്‍ തോമസ് ഐസക്ക് അവതരിപ്പിച്ച അവസാന ബജറ്റില്‍ നിന്ന് നയപരമായ മാറ്റം ഈ ബജറ്റില്‍ ഉണ്ടായേക്കില്ല. ആരോഗ്യരംഗത്തിനും സാമ്പത്തിക ഉത്തേജനത്തിനും ഊന്നല്‍ നല്‍കുന്ന ബജറ്റില്‍ കൊവിഡ് വാക്‌സിന് വേണ്ട വകയിരുത്തലുകളും ഉണ്ടാകുമെന്ന പ്രതീക്ഷയിലാണ് സംസ്ഥാനം.
സംസ്ഥാനം കൊവിഡ് ലോക്ക് ഡൗണിലൂടെ കടന്ന് പോകുന്ന സമയത്ത് കൊവിഡ് പ്രതിരോധത്തിനും വാക്സിനേഷനും പുറമെ ക്ഷേമപ്രവര്‍ത്തനങ്ങൾക്കുള്ള പണം വിലയിരുത്തലും ആവശ്യമാണ്. തെരഞ്ഞെടുപ്പുകാലത്തെ ബജറ്റിൽ നികുതി വർധനവ് ഉണ്ടായിരുന്നില്ലെങ്കിലും അടുത്ത മൂന്നുവര്‍ഷത്തേക്ക് തെരഞ്ഞെടുപ്പുകളില്ലാത്തതിനാല്‍ വരുമാനം കണ്ടെത്താന്‍ നികുതി നിര്‍ദേശങ്ങള്‍ ഉണ്ടാകുമോയെന്നതും കാത്തിരുന്ന് കാണണം.
