ചെന്നൈ : ധനുഷിനെ നായകനാക്കി കാർത്തിക് സുബ്ബരാജ് സംവിധാനം ചെയ്ത തമിഴ് ബ്ലോക്ക്ബസ്റ്റർ ജഗമെ തന്തിരത്തിന്റെ ട്രെയിലർ നെറ്റ്ഫ്ലിക്സ് പുറത്തിറക്കി.വിദേശ പശ്ചാത്തലത്തിലൊരുങ്ങുന്ന സിനിമയിൽ ധനുഷ് ,അസാധാരണനായ ഒരു തമിഴ് ഗുണ്ടയുടെ കഥാപാത്രവുമായെത്തുന്നു. YNOT സ്റ്റുഡിയോയും റിലയൻസ് എന്റർടൈൻമെന്റും ചേർന്ന് നിർമ്മിച്ച ജഗമെ തന്തിരം 2021 ജൂൺ 18 ന് ലോകമെമ്പാടും നെറ്റ്ഫ്ലിക്സിൽ റിലീസ് ചെയ്യും.
ധനുഷിനൊപ്പം ഐശ്വര്യ ലക്ഷ്മി, ജോജു ജോർജ്, കലയ്യരാസൻ, ശരത് രവി, ജെയിംസ് കോസ്മോ എന്നിവരുൾപ്പെടെയുള്ള വമ്പൻ താരനിര അണിനിരക്കുന്ന ചിത്രത്തിന്റെ സംഗീതം സന്തോഷ് നാരായണനാണ്. റിലീസിന് മുൻപ് തന്നെ ‘രകിട്ട രകിട്ട. ഉൾപ്പെടെയുള്ള ഗാനങ്ങൾ ഹിറ്റ് ചാർട്ടിൽ ഇടം പിടിച്ചിട്ടുണ്ട്.
2021 ൽ ഏറെ പ്രതീക്ഷയോടെ കാത്തിരിക്കുന്ന ജഗമെ തന്തിരം ലോകമെമ്പാടുമുള്ള 208 ദശലക്ഷം നെറ്റ്ഫ്ലിക്സ് ഉപയോക്താക്കൾക്ക് ലഭ്യമാകും.തെലുങ്ക്, കന്നഡ, ഹിന്ദി, മലയാളം എന്നിവിടങ്ങളിലും ചിത്രം ഡബ്ബ് ചെയ്യപ്പെടുന്നു.
സിനിമയെ കുറിച്ചുള്ള കാർത്തിക് സുബ്ബരാജിന്റെ പ്രതികരണം
“ജഗമെ തന്തിരം എന്റെ സ്വപ്ന ചിത്രമാണ്, ആഗോളതലത്തിൽ പ്രചാരത്തിലുള്ള ഒരു പ്രശ്നത്തെക്കുറിച്ച്, പ്രാദേശികമായി വേരൂന്നിയ ഒരു കഥാപാത്രത്തിലൂടെ – വളരെ രസകരവും വിനോദപ്രദവുമായ രീതിയിൽ, ഒരു കഥപറയുക എന്ന ആഗ്രഹത്തോടെയാണ് ഇത് നിർമ്മിച്ചത് 190 രാജ്യങ്ങളിലായി നെറ്റ്ഫ്ലിക്സു പോലൊരു ഗ്ലോബൽ പ്ലാറ്റ്ഫോമിൽ റിലീസ് ചെയ്യുന്നതിലൂടെ ഒരു നടൻ എന്ന നിലയിൽ എന്താണ് ധനുഷ് എന്നു തെളിയിക്കുന്ന സിനിമ കൂടിയായിരിക്കും ജഗമേ തന്തിരം. ക്യാമറ: ശ്രേയാസ് കൃഷ്ണ, എഡിറ്റർ: വിവേക് ഹർഷൻ
