”K S R T C’ ഇനി കേരളത്തിന് സ്വന്തം. കെഎസ് ആർ ടി സി എന്ന പേരും ലോഗോയും കേരളത്തിന് ഉപയോഗിക്കാം. കർണ്ണാടകയുടെ ആവശ്യം തള്ളി കേന്ദ്ര ട്രേഡ് മാർക്ക് രജിസ്ട്രാർ ഉത്തരവായി. കെഎസ് ആർ ടി സി എന്ന പേര് ഉപയോഗിക്കരുതെന്ന് ആവശ്യപ്പെട്ട് കേരളം കർണ്ണാടകത്തിന് കത്തു നൽകും’ ആന്റണി രാജു ഫേസ്ബുക്ക് പോസ്റ്റിലൂടെ പറഞ്ഞു.
ജനങ്ങളുടെ ജീവിതവുമായി ഇഴുകി ചേർന്നതാണ് കേരളത്തിൽ കെ എസ് ആർ ടി സി യുടെ ചരിത്രമെന്നും മന്ത്രി പ്രതികരിച്ചു. വെറുമൊരു വാഹന സർവീസ് മാത്രമല്ല, അത്. സിനിമയിലും, സാഹിത്യത്തിലും ഉൾപ്പടെ നമ്മുടെ സാംസ്‌കാരിക ജീവിതത്തിൽ ഈ പൊതു ഗതാഗത സംവിധാനത്തിന്റെ മുദ്രകൾ പതിഞ്ഞിട്ടുണ്ട്. അത്ര വേഗത്തിൽ മായ്ച്ചു കളയാൻ പറ്റുന്നതല്ല ഇതെന്നും ഗതാഗതമന്ത്രി പറഞ്ഞു.
കെ എസ് ആർ ടി സി എന്ന ചുരുക്കെഴുത്തും , ലോഗോയും ആന വണ്ടി എന്ന പേരുമാണ് കേരളത്തിന് അനുവദിച്ച് ട്രേഡ് മാർക്ക് രജിസ്ട്രാർ ഉത്തരവിറക്കിയത്. ഉത്തരവ് പ്രകാരം കേരളത്തിന്‍റെയും, കർണ്ണാടകയുടേയും റോഡ് ട്രാൻസ്പോർട്ട് കോർപ്പറേഷന്‍റെ വാഹനങ്ങളിൽ പൊതുവായി ഉപയോഗിച്ച് വരുന്ന കെഎസ്ആർടിസി എന്ന പേര് ഇനി മുതൽ കേരളത്തിന് മാത്രമേ ഉപയോഗിക്കാൻ കഴിയൂ.
രണ്ട് സംസ്ഥാനങ്ങളും ഉപയോഗിച്ച വന്ന കെഎസ്ആർടിസി എന്ന പേര് തങ്ങളുടേതാണെന്നും കേരളം ഉപയോഗിക്കരുതെന്നും 2014ൽ കർണാടകം നോട്ടീസ് അയച്ചതോടെയാണ് വർഷങ്ങൾ നീണ്ട് നിന്ന് നിയമ യുദ്ധം ആരംഭിക്കുന്നത്. കർണാടകയുടെ നോട്ടീസിന് പിന്നാലെ അന്നത്തെ സിഎംഡിയായിരുന്ന അന്തരിച്ച ആന്റണി ചാക്കോ കേന്ദ്ര സർക്കാരിന് കീഴിലെ രജിസ്ട്രാർ ഓഫ് ട്രേഡ്മാർക്കിന് സംസ്ഥാനത്തിനുവേണ്ടി അപേക്ഷ നൽകുകായിരുന്നു.
കെ എസ് ആർ ടി സി എന്ന് ഇനി മുതൽ കേരളത്തിന് മാത്രമേ ഉപയോഗിക്കാൻ കഴിയൂവെന്നും അതുകൊണ്ട് കർണ്ണാടകത്തിന് ഉടൻ തന്നെ നോട്ടീസ് അയക്കുമെന്ന് കെ എസ് ആർ ടി സി എം ഡി യും, ഗതാഗത സെക്രട്ടറിയുമായ ബിജു പ്രഭാകരും നേരത്തെ വ്യക്തമാക്കിയിരുന്നു. ഇതിന് പിന്നാലെയാണ് ഗതാഗത മന്ത്രിയും നിലപാട് വ്യക്തമാക്കിയത്.
