സംസ്ഥാനത്തെ എല്ലാ സ്‌കൂളുകളിലും ഓൺലൈൻ പ്രവേശനോത്സവും ഉണ്ടായിരിക്കും. രാവിലെ 9.30 മുതൽ വിക്‌ടേഴ്‌സ് ചാനലിലൂടെ വിദ്യാർഥികളുമായി ബന്ധപ്പെട്ട പരിപാടികൾ ആരംഭിക്കും. പ്രവേശനം പൂർത്തിയായില്ലെങ്കിലും മൂന്നരലക്ഷത്തോളം വിദ്യാർഥികൾ ഈ വർഷം ഒന്നാം ക്ലാസിൽ എത്തുമെന്നാണ് കരുതുന്നത്.
വെർച്വൽ ക്ലാസുകളുടെ ആദ്യരണ്ടാഴ്‌ച ട്രയൽ അടിസ്ഥാനത്തിലായിരിക്കും. മുഴുവൻ കുട്ടികൾക്കും ക്ലാസുകൾ പ്രയോജനപ്പെടുത്താൻ കഴിയുന്നുണ്ടോ എന്ന കാര്യമാകും ഈ ഘട്ടത്തിൽ സർക്കാർ പരിശോധിക്കുക. അധ്യാപകർ ഇക്കാര്യത്തിൽ ഉറപ്പുവരുത്തണം. എല്ലാ കുട്ടികൾക്കും ക്ലാസിൽ പങ്കെടുക്കാൻ കഴിയുന്നുണ്ടെന്ന് ഉറപ്പ് വരുത്തിയ ശേഷം ജൂലൈ മാസത്തോടെ പത്ത്, പ്ലസ്‌ടു ക്ലാസുകളിൽ വിദ്യാർഥികളും അധ്യാപകരും സംവദിക്കുന്ന ഓൺലൈൻ ക്ലാസുകൾ ആരംഭിക്കും. പിന്നാലെ ഘട്ടം ഘട്ടമായി മറ്റ് ക്ലാസുകളിലേക്ക് ഈ മാതൃക കൊണ്ടുവരും.
വിക്‌ടേഴ്‌സ് ചാനലിലൂടെയുള്ള ക്ലാസുകൾക്ക് പുറമേ അതത് സ്‌കൂളുകളിൽ നിന്ന് കൂടി ക്ലാസ് ആരംഭിക്കണമെന്ന നിർദേശവും സർക്കാർ നൽകിയിട്ടുണ്ട്. ഓരോ ദിവസവും സംപ്രേക്ഷണം ചെയ്യുന്ന ക്ലാസുകളുടെ ടൈം ടേബിൾ കൈറ്റ് വിക്‌ടേഴ്‌സ് പ്രസിദ്ധീകരിച്ചിട്ടുണ്ട്. പാഠപുസ്‌തക വിതരണം ജൂൺ 15 മുതൽ പൂർത്തിയാക്കാണ് ശ്രമം യൂണിഫോം വിതരണവും പതിവ് പോലെ ഉണ്ടാകും.
