തിരുവനന്തപുരം
മഴക്കാല പകർച്ചവ്യാധി പ്രതിരോധ ജനകീയ ശുചീകരണ പരിപാടി സംസ്ഥാനത്ത് ജൂൺ നാല്, അഞ്ച്, ആറ് തീയതികളിൽ നടത്തും. തദ്ദേശ സ്ഥാപനതലത്തിൽ ജനകീയമായി നടത്തപ്പെടുന്ന ഈ പരിപാടിയെക്കുറിച്ച് ചിട്ടയായ ഒരു പരിശീലനം കിലയുടെ നേതൃത്വത്തിൽ 31, ജൂൺ ഒന്ന് ദിവസങ്ങളിൽ പകൽ 11 മുതൽ ഒന്നുവരെ ഓൺലൈനായി നടത്തും. ആരോഗ്യ വകുപ്പ്, ശുചിത്വ മിഷൻ, ഹരിതകേരളം മിഷൻ, കുടുംബശ്രീ മിഷൻ എന്നിവയുടെ സഹകരണത്തോടെയാണ് പരിപാടി സംഘടിപ്പിക്കുന്നത്.
എല്ലാ ജനപ്രതിനിധികളും ഉദ്യോഗസ്ഥരും ആരോഗ്യ വിഭാഗം ജീവനക്കാർ, കുടുംബശ്രീ, ആശാ, വാർഡ്സമിതി പ്രവർത്തകർ എന്നിവർക്കായാണ് പരിശീലന പരിപാടി സംഘടിപ്പിക്കുന്നത്. ഒരു പൗരബോധന പരിപാടിയെന്ന നിലയിലും ഏവരും അറിഞ്ഞിരിക്കേണ്ട വിഷയങ്ങൾ ഉൾപ്പെടുത്തിയ പരിശീലനമായതിനാൽ എല്ലാ വിഭാഗത്തിനും ഇതിൽ പങ്കെടുക്കാം.
പരിശീലനത്തിന്റെ ആദ്യ ദിവസം മഴക്കാല രോഗങ്ങൾ പ്രതിരോധിക്കുന്നതിന്റെ ഭാഗമായുള്ള ശുചീകരണത്തിന്റെ വിവിധ വശങ്ങളെക്കുറിച്ച് വിദഗ്ധർ ക്ലാസുകൾ എടുക്കും. രണ്ടാം ദിവസം മഴക്കാല രോഗങ്ങളും പ്രതിരോധ മാർഗങ്ങളും എന്ന വിഷയത്തെ ആസ്പദമാക്കി ആരോഗ്യ വകുപ്പിലെ വിദഗ്ധർ ക്ലാസുകൾ നയിക്കും.
മഴക്കാല പൂർവശുചീകരണം -ആവശ്യകതയും സ്വീകരിക്കേണ്ട സമീപനവും, ഗാർഹിക തലം, സ്ഥാപനതലം, സാമൂഹ്യ തലം, പൊതുതലം എന്നിവിടങ്ങളിൽ ശ്രദ്ധിക്കേണ്ട കാര്യങ്ങൾ, അജൈവമാലിന്യ പരിപാലനം, ആരോഗ്യ പരിരക്ഷയും മാലിന്യ നിർമാർജനവും മഴക്കാല പൂർവ ശുചീകരണത്തിന്റെ പിന്തുണാ സംവിധാനങ്ങൾ എന്നീ വിഷയങ്ങളാണ് ഒന്നാം ദിവസം കൈകാര്യം ചെയ്യുക. രണ്ടാം ദിവസം മഴക്കാല രോഗങ്ങളും അവയുടെ പ്രതിരോധ പ്രവർത്തനങ്ങളും, മഴക്കാല രോഗങ്ങളും അവയുടെ ലക്ഷണങ്ങളും, എടുക്കേണ്ട നടപടികൾ തുടങ്ങിയവയാണ് ഉള്ളടക്കം. സംശയനിവാരണത്തിനുള്ള അവസരവും ഉണ്ടാകും.
കിലയുടെ ഫെയ്സ്ബുക്ക്- യൂട്യൂബ് ചാനലിലൂടെയാണ് (https://www.facebook.com/kilatcr | https://www.youtube.com/kilatcr) ഈ പരിശീലനം.
