വിദേശയാത്ര നടത്തുന്നവ‍ര്‍ക്ക് വാക്സിനേഷൻ സര്‍ട്ടിഫിക്കറ്റ് ലഭിക്കാൻ എന്ത് ചെയ്യണം?

വിദേശത്തേക്ക് മടങ്ങുന്നവർക്ക് വാക്സിനേഷൻ സർട്ടിഫിക്കറ്റ്, മുൻഗണന പ്രകാരം രണ്ടാം ഡോസ് വാക്സിൻ എന്നിവ ലഭിക്കുന്നതിന് എന്ത് ചെയ്യണമെന്ന് വ്യക്തമാക്കിയിരിക്കുകയാണ് സംസ്ഥാന ആരോഗ്യ വകുപ്പ്. വിദേശ രാജ്യങ്ങളിലേക്ക് യാത്ര ചെയ്യുന്നവർക്ക് കൊവിഷീൽഡ് രണ്ടാം ഡോസ് വാക്സിൻ നാല് മുതൽ ആറ് ആഴ്ചകൾക്കുള്ളിൽ നൽകാനും വാക്സിനേഷൻ സർട്ടിഫിക്കറ്റ് നൽകാനും ആരോഗ്യ വകുപ്പ് മാർഗ നിർദ്ദേശങ്ങൾ പുറത്തിറക്കിയിരുന്നു.

18 വയസിനു മുകളിലുള്ള വാക്സിൻ രണ്ട് ഡോസ് സ്വീകരിക്കുകയും വിദേശ യാത്രയ്ക്കായി വാക്സിനേഷൻ സർട്ടിഫിക്കറ്റിൽ പാസ്പോർട്ട് നമ്പർ ഉൾപ്പെടുത്തുകയും ചെയ്തവർക്കാണ് സംസ്ഥാന സർക്കാർ നൽകുന്ന വാക്സിനേഷൻ സർട്ടിഫിക്കറ്റിന് അർഹത. വിദേശ രാജ്യങ്ങളുടെ വാക്സിൻ നയപ്രകാരം കൊവിഷീൽഡ് എന്നതിന് പകരം ആസ്ട്രാസെനക്ക എന്ന് രേഖപ്പെടുത്തണ്ടവർക്കും സർട്ടിഫിക്കറ്റ് ലഭ്യമാക്കുന്നതാണ്.

സർട്ടിഫിക്കറ്റ് ലഭിക്കാൻ എന്ത് ചെയ്യണം?

രണ്ടാം ഡോസ് വാക്സിൻ ലഭിച്ച് കഴിയുമ്പോൾ വാക്സിനേഷൻ കേന്ദ്രത്തിൽ നിന്നും ഒരു താൽക്കാലിക സർട്ടിഫിക്കറ്റ് ലഭിക്കും. തുടർന്ന് https://covid19.kerala.gov.in/vaccine/ എന്ന സൈറ്റ് സന്ദർശിച്ച് വാക്സിനേഷൻ സർട്ടിഫിക്കറ്റ് (വിദേശത്ത് പോകുന്നവർ) എന്ന ടാബിൽ ക്ലിക്ക് ചെയ്യുക.

തുടർന്ന് വാക്സിനേഷൻ കേന്ദ്രത്തിൽ നിന്നും ലഭിച്ച സർട്ടിഫിക്കറ്റും വ്യക്തിഗത വിവരങ്ങളും നൽകാം. തുടർന്ന് ഇവ പരിശോധിച്ചശേഷം അർഹതയുള്ളവർക്ക് മെഡിക്കൽ ഓഫീസർ സർട്ടിഫിക്കറ്റ് നൽകും. ആവശ്യം നിരസിക്കപ്പെട്ടാൽ കാരണം വ്യക്തമാക്കി എസ്എംഎസ് ലഭിക്കും. തുടർന്ന് തെറ്റിയ ഭാഗം തിരുത്തി വീണ്ടും അപേക്ഷിക്കാവുന്നതാണ്.

അതേസമയം, രണ്ടാം ഡോസ് വാക്സിൻ അടിയന്തരമായി ലഭിക്കുന്നതിന് https://covid19.kerala.gov.in/vaccine/ എന്ന വെബ്സൈറ്റ് സന്ദർശിക്കുക. യാത്രയുമായി ബന്ധപ്പെട്ട വിവരങ്ങൾ ഈ സൈറ്റിൽ അപ്ലോഡ് ചെയ്യാം. നിലവിൽ ഈ സൈറ്റ് പ്രവർത്തന സജ്ജമല്ല, ഉടൻ പ്രവർത്തനം ആരംഭിക്കുമെന്നാണ് ആരോഗ്യ വകുപ്പ് വ്യക്തമാക്കിയിരിക്കുന്നത്.