നിയമസഭാ തെരഞ്ഞെടുപ്പ് തോൽവിയുടെ പൂർണ ഉത്തരവാദിത്തം തനിക്കാണ്. ഇതിൻ്റെ ഉത്തരവാദിത്തം മറ്റാരുടെയും തലയിൽ കെട്ടിവെക്കാൻ ഉദ്ദേശിക്കുന്നില്ല. പരജയത്തിൽ ദുഃഖവും വേദനയമുണ്ട്. മികച്ച സഹകരണമാണ് സോണിയ ഗാന്ധിയിൽ നിന്നും രാഹുൽ ഗാന്ധിയിൽ നിന്നും ലഭിച്ചത്. എന്നാൽ താൻ സോണിയ ഗാന്ധിക്ക് കത്തയച്ചു എന്ന വാർത്ത അടിസ്ഥാനരഹിതമാണ്. അങ്ങനെയൊരു കത്ത് എഴുതേണ്ട ആവശ്യമില്ലെന്നും മുല്ലപ്പള്ളി വ്യക്തമാക്കി.
തെരഞ്ഞെടുപ്പ് പരാജയമുണ്ടായ ദിവസം പടിയിറങ്ങിപ്പോകാൻ അറിയാഞ്ഞിട്ടല്ല. അത്തരം തീരുമാനങ്ങൾ സ്വീകരിക്കുന്നതിൽ ഒരിക്കലും പിന്നോട്ട് പോയിട്ടുമില്ല. എന്നാൽ പാർട്ടി പരാജയപ്പെട്ട നിർണായക ഘട്ടത്തിൽ ഇട്ടിട്ടുപോയ ആൾ എന്ന് ചരിത്രം രേഖപ്പെടുത്താതിരിക്കാനാണ് കെപിസിസി സ്ഥാനത്ത് തുടർന്നതെന്നും മുല്ലപ്പള്ളി പറഞ്ഞു.
തെരഞ്ഞെടുപ്പ് തോൽവി പഠിക്കുന്ന അശോക് ചവാൻ കമ്മിറ്റിയിലെ ഒരാൾ ഒഴികെയുള്ള എല്ലാ അംഗങ്ങളെയും വർഷങ്ങളായി അറിയാം. ഇവർ സുഹൃത്തുക്കൾ കൂടിയാണ്. കമ്മീഷന് മുന്നിലെത്തി വിവരങ്ങൾ ബോധിപ്പിക്കില്ലെന്ന് ചവാനെ അറിയിച്ചിരുന്നു. വിശദമായ റിപ്പോർട്ട് സോണിയ ഗാന്ധിക്ക് കൈമാറിയിട്ടുണ്ടെന്നും, അത് തൻ്റെ പ്രസ്‌താവനയായി സ്വീകരിക്കണമെന്നുമാണ് വ്യക്തമാക്കിയതെന്നും അദ്ദേഹം പറഞ്ഞു.
കോൺഗ്രസിൽ വിഭാഗീയതയുണ്ടെന്ന തരത്തിലുള്ള വാർത്തകൾ മാധ്യമങ്ങൾ നൽകരുത്. എല്ലാവരും ഒറ്റക്കെട്ടായി നീങ്ങുന്ന പാർട്ടിയിൽ യാതൊരു തരത്തിലുമുള്ള ആശയസംഘർഷമില്ല. ഒരുപാട് ഇലപൊഴിയും കാലം കണ്ട പാർട്ടിയാണിത്. രാജി സന്നദ്ധത അറിയിച്ചതിനാലാണ് കഴിഞ്ഞ ദിവസം ചേർന്ന യുഡിഎഫ് ഏകോപന സമിതി യോഗത്തിൽ നിന്നും വിട്ടു നിന്നതെന്നും മുല്ലപ്പള്ളി കൂട്ടിച്ചേർത്തു.
