തെലങ്കാനയിലെ മുനിസിപ്പൽ അഡ്മിനിസ്ട്രേഷൻ, നഗരവികസനം, വ്യവസായങ്ങൾ, വാണിജ്യ, വിവരസാങ്കേതിക മന്ത്രിയായ കൽ‌വകുന്ത്ല താരക രാമറാവുവിനോടാണ് യുവാവ് പരാതി പറഞ്ഞത്. കെ‌ടി‌ആർ എന്ന പേരിൽ അറിയപ്പെടുന്ന മന്ത്രി ട്വിറ്ററിൽ സജീവമാണ്. ട്വിറ്ററിൽ സഹായം ആവശ്യപ്പെടുന്ന വ്യക്തികളോട് അദ്ദേഹം പതിവായി പ്രതികരിക്കാറുണ്ട്. മെഡിക്കൽ ആവശ്യങ്ങൾ മുതൽ ഈ പാസ് വരെയുള്ള ആവശ്യങ്ങൾക്കായി തന്നോട് ട്വീറ്റ് ചെയ്യുന്നവർക്ക് കൃത്യമായ മാർഗ നിർദേശങ്ങൾ നൽകി പ്രശ്നങ്ങൾ പരിഹരിക്കുന്നതിൽ പ്രത്യേകം ശ്രദ്ധിക്കുന്ന ന്യൂജെൻ മന്ത്രിയാണ് കെ‌ടി‌ആർ.
മന്ത്രിയുടെ ഈ രീതികൾ കണ്ടിട്ടാവണം തോട്ടകുറി രഘുപതി എന്ന് പേരുള്ള ട്വിറ്റർ ഉപഭോക്താവ് താൻ ഓർഡർ ചെയ്ത ബിരിയാണിയിൽ ചിക്കൻ ബിരിയാണിയിൽ ലെഗ്പീസ് ഇല്ല എന്ന് ട്വീറ്റ് ചെയ്തത്. “കൂടുതൽ മസാലയും ലെഗ് പീസും ആവശ്യപ്പെട്ട് ഞാൻ ചിക്കൻ ബിരിയാണി ഓർഡർ ചെയ്‌തു. രണ്ടും എനിക്ക് കിട്ടിയില്ല. ഇങ്ങനെയാണോ നിങ്ങളുടെ സേവനം” എന്ന കുറിപ്പോടെ സോമറ്റോയെയും (ഭക്ഷണം ഓർഡർ ചെയ്ത ആപ്പ്) കെ‌ടി‌ആറിനെയും ടാഗ് ചെയ്താണ് യുവാവിന്റെ പോസ്റ്റ്. മന്ത്രിയുടെ പ്രതികരണമാണ് സൈബർ ലോകത്ത് ചർച്ച വിഷയമായത്. “എന്നെ എന്തിനാണ് സഹോദര ടാഗ് ചെയ്തിരിക്കുന്നത്? ഇക്കാര്യത്തിൽ ഞാൻ ചെയ്യണമെന്നാണ് നിങ്ങൾ പ്രതീക്ഷിക്കുന്നത്?” എന്ന് മന്ത്രിയുടെ മറുപടി.
മന്ത്രിയുടെ മറുപടി വന്നതോടെ തോട്ടകുറി രഘുപതി തന്റെ ട്വീറ്റ് ഡിലീറ്റ് ചെയ്‌തു. പക്ഷെ അതിനകം ഈ സംഭാഷണത്തിന്റെ സ്ക്രീൻ ഷോട്ടുകൾ സമൂഹ മാധ്യമങ്ങളിൽ വൈറൽ ആയി. നിരവധി പേരാണ് മന്ത്രി പ്രതികരിച്ചതിനെ പ്രശംസിച്ച് ട്വിറ്ററിൽ പോസ്റ്റ് ചെയ്യുന്നത്.
