കമ്പനികളുടെ പേരോ വിലയോ രേഖപ്പെടുത്താത്ത ഗുണനിലവാരമില്ലാത്ത പൾസ്ഓക്സീ മീറ്ററുകൾ വിപണിയിൽ നിന്നും വാങ്ങാതിരിക്കാൻ ശ്രദ്ധിക്കണം. ശരീരത്തിലെ ഓക്സിജന്റെ അളവ് കൃത്യമായി മനസിലാക്കേണ്ടത് കൊവിഡ് രോഗികളുടെ സുരക്ഷ ഉറപ്പാക്കുന്നതിന് അത്യാവശ്യമാണ്. തെറ്റായ വിവരങ്ങൾ നൽകുന്നത് രോഗികളുടെ ജീവൻ അപകടത്തിലാക്കാൻ സാധ്യതയുണ്ടെന്നും മുഖ്യമന്ത്രി പറഞ്ഞു.
കൊവിഡ് സർവ്വീസ് കോർപ്പറേഷൻ ഗുണനിലവാരം പരിശോധിച്ച് ചുരുക്കപ്പട്ടികയിൽ ഉൾപ്പെടുത്തിയ പൾസ് ഓക്സീമീറ്ററുകൾ മാത്രമേ വാങ്ങാവൂ. ആ പട്ടിക പൊതുജനങ്ങളുടെ അറിവിലേക്കായി ഉടൻ പരസ്യപ്പെടുത്തുമെന്നും മുഖ്യമന്ത്രി വ്യക്തമാക്കി.
ബ്ലാക്ക് ഫംഗസിന്റെ ചികിത്സയ്ക്ക് ആവശ്യമായ മരുന്നുകൾ സംസ്ഥാനത്ത് എത്തിച്ചിട്ടുണ്ട്. മരുന്ന് ഉത്പാദിപ്പിക്കുന്ന കമ്പനികളുമായി നേരിട്ട് ബന്ധപ്പെട്ട് മരുന്ന് ലഭ്യമാക്കാൻ മെഡിക്കൽ സർവ്വീസ് കോർപ്പറേഷനെ ചുമതലപ്പെടുത്താൻ ആലോചിക്കുകയാണെന്നും മുഖ്യമന്ത്രി വാർത്താ സമ്മേളനത്തിൽ പറഞ്ഞു.
