കക്ഷിരാഷ്ട്രീയം പറയുമെന്നല്ല താൻ ഉദ്ദേശിച്ചതെന്ന് സ്‌പീക്കർ പറഞ്ഞു. “കക്ഷി രാഷ്‌ട്രീയത്തിൻ്റെ ഭാഗമായി സ്‌പീക്കർ പ്രവർത്തിക്കില്ല. എന്നാൽ സഭയ്‌ക്ക് പുറത്ത് ഉയർന്നുവരുന്ന പൊതുവായ രാഷ്‌ട്രീയ വിഷയങ്ങളിലും സാമൂഹിക – സാംസ്‌കാരിക വിഷയങ്ങളിൽ അഭിപ്രായം പറയും. സഭയ്‌ക്ക് പുറത്ത് രാഷ്‌ട്രീയം പറയുമെന്ന തൻ്റെ പ്രസ്‌താവന പലർക്കുമുണ്ടായി” – എന്നും അദ്ദേഹം നിയമസഭയിൽ പറഞ്ഞു.
ജനങ്ങളെ ബാധിക്കുന്ന ഏത് വിഷയവും ഉയർത്തുന്നതിനുള്ള പൂർണ സ്വാതന്ത്രം നൽകുന്നതിനൊപ്പം സ്‌പീക്കർ എന്ന നിലയിൽ ഭരണ – പ്രതിപക്ഷ ഭേദമില്ലാതെ ഏത് വിഷയവും ഉയർത്തുന്നതിനുള്ള പൂർണ സ്വാതന്ത്രവും നൽകുമെന്നും രാജേഷ് വ്യക്തമാക്കി.
സ്‌പീക്കർ പദവിയുടെ അന്തസും ഇത് നിർവഹിക്കുമ്പോൾ പാലിക്കേണ്ട ഔചിത്യവും പാലിച്ചായിരിക്കും അഭിപ്രായ പ്രകടനങ്ങൾ ഉണ്ടാകുകയെന്നും രാജേഷ് പറഞ്ഞു. നിയമസഭയിൽ രാജേഷ് നിലപാട് വ്യക്തമാക്കിയതിന് പിന്നാലെ സതീശൻ കയ്യടിച്ച് പിന്തുണച്ചു.
സഭയ്‌ക്ക് പുറത്ത് രാഷ്‌ട്രീയം പറയുമെന്ന രാജേഷിൻ്റെ പരാമർശം വേദനിപ്പിച്ചെന്ന് പ്രതിപക്ഷ നേതാവ് വി ഡി സതീശൻ നിയമസഭയിൽ പറഞ്ഞത്. “രാജേഷ് സഭയ്‌ക്ക് പുറത്ത് രാഷ്‌ട്രീയം പറഞ്ഞാൽ ഞങ്ങൾക്ക് സഭയിൽ രാഷ്‌ട്രീയം പറയേണ്ടിവരും. വേദനയുണ്ടാക്കുന്ന ആ പരാമർശം ഒഴിവാക്കേണ്ടതായിരുന്നു” – എന്നും അദ്ദേഹം വ്യക്തമാക്കിയത്.
