പാർട്ടിയുടെ നയപരമായ നിലപാടുകൾ വ്യക്തമാക്കേണ്ടത് കെപിസിസിയാണെന്നും പ്രതിപക്ഷ നേതാവല്ലെന്നും എൻഎസ്എസ് പ്രസ്താവനയിലൂടെ പറഞ്ഞു. സ്ഥാനം ഉറപ്പായി എന്നറിഞ്ഞപ്പോൾ മുതൽ മത-സാമുദായികസംഘടനകളെ നിലവാരംകുറഞ്ഞ ഭാഷയില് ഇപ്പോഴത്തെ പ്രതിപക്ഷ നേതാവ് വിമര്ശിക്കുന്നത് കാണാനിടയായി. ഈ രാജ്യത്തെ ഒരു ദേശീയപ്പാര്ട്ടി എന്ന നിലയില് കോണ്ഗ്രസിന്റെ പാരമ്പര്യം അതാണോ എന്ന് നേതൃത്വം വിലയിരുത്തേണ്ടിയിരിക്കുന്നുവെന്നാണ് എൻഎസ്എസ് പറഞ്ഞത്.
രാജ്യത്തെ എല്ലാ മത-സാമുദായികവിഭാഗങ്ങളെയും സംഘടനകളെയും തങ്ങളോടു ചേര്ത്തുനിര്ത്തിയ അനുഭവമാണ് കോണ്ഗ്രസിന്റെ ഭാഗത്തുനിന്നും ഇന്നോളം ഉണ്ടായിട്ടുള്ളത്. രാഷ്ട്രീയപ്പാര്ട്ടികളുടെ ആഭ്യന്തരപ്രശ്നങ്ങളില് മത-സാമുദായികസംഘടനകള് ഇടപെടാന് പാടില്ല. എന്നാല് അവരുടെ പ്രവര്ത്തനങ്ങള് വിലയിരുത്താനും അഭിപ്രായം പറയാനുമുള്ള അവകാശം വ്യക്തികള്ക്കുള്ളതുപോലെ മത-സാമുദായികസംഘടനകള്ക്കും ഉണ്ടെന്ന് രാഷ്ട്രീയനേതൃത്വങ്ങള് മനസ്സിലാക്കണമെന്നും എൻഎസ്എസ് പറയുന്നു.
പാര്ട്ടിയുടെ നയപരമായ നിലപാടുകള് വ്യക്തമാക്കേണ്ടത് കെ.പി.സി.സി.യാണ്, പ്രതിപക്ഷനേതാവല്ല. മത-സാമുദായികസംഘടനകളോടും അതിന്റെ നേതാക്കളോടുമുള്ള പുതിയ പ്രതിപക്ഷനേതാവിന്റെ ഇപ്പോഴത്തെ സമീപനം സംബന്ധിച്ചും ശബരിമല വിശ്വാസസംരക്ഷണം സംബന്ധിച്ചും കെ.പി.സി.സി.യുടെ നിലപാട് എന്താണെന്ന് അറിയേണ്ടതുണ്ട്. ആവശ്യം വരുമ്പോള് മത-സാമുദായികസംഘടനകളെ സമീപിക്കുകയും സഹായം അഭ്യര്ത്ഥിക്കുകയും ചെയ്യുകയും, അതിനുശേഷം തള്ളിപ്പറയുകയും ചെയ്യുന്ന സ്വഭാവം ആര്ക്കും യോജിച്ചതല്ലെന്നും എൻഎസ്എസ് പറഞ്ഞു.
ഈ തെരഞ്ഞെടുപ്പില് മുന്നണിവ്യത്യാസമില്ലാതെതന്നെ, എല്ലാ രാഷ്ട്രീയപ്പാര്ട്ടികളില്പ്പെട്ട ബഹുഭൂരിപക്ഷം സ്ഥാനാര്ത്ഥികളും എന്.എസ്.എസ്സില് വന്ന് സഹായം അഭ്യര്ത്ഥിക്കുകയുണ്ടായി എന്നും പ്രതിപക്ഷ നേതാവും ഇത്തരത്തിൽ സഹായം അഭ്യർഥിച്ച് വന്നിരുന്നെന്നും എൻഎസ്എസ് പറയുന്നു. പ്രതിപക്ഷനേതാവും ഇത്തവണത്തെ തെരഞ്ഞെടുപ്പില് സഹായം അഭ്യര്ത്ഥിച്ച് എന്.എസ്.എസ്. ആസ്ഥാനത്ത് എത്തി, ഒരു മണിക്കൂറോളം ചെലവഴിച്ചതാണ്. അതിനുശേഷം താലൂക്ക് യൂണിയന് നേതൃത്വത്തെയും കരയോഗനേതൃത്വങ്ങളെയും നേരിട്ടുകണ്ട് അവരോടും സഹായം അഭ്യര്ത്ഥിച്ചു. എന്നിട്ടാണ് പുതിയ സ്ഥാനലബ്ധിയില് മതിമറന്ന് ഇത്തരം വിലകുറഞ്ഞ പ്രസ്താവനകള് നടത്തിക്കൊണ്ടിരിക്കുന്നത്’ എൻഎസ്എസ് പ്രസ്താവനയിൽ പറയുന്നതായി മാതൃഭൂമി റിപ്പോർട്ട് ചെയ്തു.
രാഷ്ട്രീയമായ ഒരേ നിലപാടാണ് മുന്നണികളോടും പാർട്ടികളോടും ഉണ്ടാവുകയെന്നും ഗവണ്മെന്റ് ചെയ്യുന്ന നല്ല കാര്യങ്ങളെ അംഗീകരിക്കുകതന്നെ ചെയ്യുമെന്നും പറയുന്ന എൻഎസ്എസ്, തെറ്റായ കാര്യങ്ങള് ശ്രദ്ധയില്പ്പെട്ടാല് അവരെ അറിയിക്കുകയും ചെയ്യുമെന്നും കൂട്ടിച്ചേർത്തു.
