സ്പീക്കർ തെരഞ്ഞെടുപ്പിൽ 136 അംഗങ്ങളാണ് വോട്ട് ചെയ്തത്. ആരോഗ്യ പ്രശ്നങ്ങളെ തുടർന്നാണ് വോട്ടെടുപ്പിൽ നിന്ന് വിട്ടുനിന്നത്. മന്ത്രി അബ്ദുറഹിമാൻ, കോവളം എംഎൽഎ എം വിൻസൻ്റ്, നെന്മാറ
എംഎൽഎ കെ ബാബു എന്നിവരാണ് വോട്ടെടുപ്പിൽ പങ്കെടുക്കാൻ എത്താതിരുന്നത്.
പ്രോടേം സ്പീക്കറുടെ നേതൃത്വത്തിൽ രാവിലെ ഒൻപത് മണിയോടെയാണ് വോട്ടെടുപ്പ് ആരംഭിച്ചത്. സഭയ്ക്കുള്ളിൽ സ്പീക്കറുടെ ഇരിപ്പിടത്തിന് സമീപത്തായിട്ടാണ് സ്ഥാപിച്ച് രണ്ട് ബൂത്തുകളിലാണ് അംഗങ്ങൾ വേട്ട് ചെയ്തത്.
സ്പീക്കറായി തെരഞ്ഞെടുക്കപ്പെട്ടതിന് പിന്നാലെ രാജേഷിനെ മുഖ്യമന്ത്രി പിണറായി വിജയനും പ്രതിപക്ഷ നേതാവ് വി ഡി സതീശനും ചേർന്ന് അദ്ദേഹത്തെ ഇരിപ്പിടത്തിലേക്ക് ആനയിച്ചു.
നിയമസഭാംഗങ്ങളുടെ ജനാധിപത്യപരമായ കടമ അർത്ഥപൂർണമാക്കാൻ രാജേഷിന് കഴിയട്ടെയെന്ന് മുഖ്യമന്ത്രി പറഞ്ഞു. “സഭാ അംഗങ്ങളുടെ അവകാശം സംരക്ഷിക്കാനും സർക്കാരിൻ്റെ ഉത്തരവാദിത്തം നിറവേറ്റാനും അദ്ദേഹത്തിനാകട്ടെ. ഈ ഉത്തരവാദിത്തം സാധ്യമാക്കാൻ എല്ലാവിധ സഹകരണവും വാഗ്ദാനം ചെയ്യുകയാണ്. അറിവും അനുഭവവും സമന്വയിച്ച സവിശേഷ വ്യക്തിത്വമാണ് രാജേഷിൻ്റേത്” – എന്നും മുഖ്യമന്ത്രി പറഞ്ഞു.
സഭയ്ക്ക് പുറത്ത് രാഷ്ട്രീയം പറയുമെന്ന രാജേഷിൻ്റെ പരാമർശം വേദനിപ്പിച്ചെന്ന് പ്രതിപക്ഷ നേതാവ് വി ഡി സതീശൻ നിയമസഭയിൽ പറഞ്ഞു. “രാജേഷ് സഭയ്ക്ക് പുറത്ത് രാഷ്ട്രീയം പറഞ്ഞാൽ ഞങ്ങൾക്ക് സഭയിൽ രാഷ്ട്രീയം പറയേണ്ടിവരും. വേദനയുണ്ടാക്കുന്ന ആ പരാമർശം ഒഴിവാക്കേണ്ടതായിരുന്നു” – എന്നും അദ്ദേഹം പറഞ്ഞു.
