പിണറായിയുടെ പിറന്നാളും പുതിയ നിയമസഭയുടെ തുടക്കവും ഒരുമിച്ച് വന്നത് യാദൃശ്ചികമാണെന്ന് കെകെ ശൈലജ ഫേസ്ബുക്കിൽ കുറിച്ചു. ‘നവ കേരളത്തിന്‍റെ നിർമാണത്തിന് സാർത്ഥകമായ നേതൃത്വം നൽകുന്ന സഖാവ് പിണറായിയുടെ പിറന്നാളും പുതിയ നിയമസഭയുടെ തുടക്കവും ഒരുമിച്ച് വന്നത് യാദൃശ്ചികമാണ് എങ്കിലും ഏറെ സന്തോഷമുള്ള കാര്യമാണ്. കേരള രാഷ്ട്രീയത്തിന്‍റെ ചുക്കാൻ പിടിക്കുന്ന മുഖ്യമന്ത്രിക്ക് എന്‍റെ ഹൃദയം നിറഞ്ഞ പിറന്നാൾ ആശംസകൾ’ ശൈലജ ടീച്ചർ കുറിച്ചു.
മുഖ്യമന്ത്രിയുടെ ചിത്രം പങ്കുവെച്ച് “മുഖ്യമന്ത്രി പിണറായി വിജയന് ഹൃദയം നിറഞ്ഞ ജന്മദിനാശംസകൾ” എന്നായിരുന്നു വിഡി സതീശൻ ഫേസ്ബുക്കിൽ കുറിച്ചത്.
എംഎൽഎമാരുടെ സത്യപ്രതിജ്ഞയും കഴിഞ്ഞ അഞ്ചുവര്‍ഷം കേരളത്തെ കരുത്തോടെ നയിച്ച സഖാവ് പിണറായി വിജയന്റെ ജന്മദിനവുമാണ് ഇന്നെന്നാണ് ആരോഗ്യ മന്ത്രി വീണാ ജോർജ് ഫേസ്ബുക്കിൽ കുറിച്ചത്. “ഇടതുപക്ഷ ജനാധിപത്യ മുന്നണിക്ക് ചരിത്രപരമായ ഭരണത്തുടര്‍ച്ചയുണ്ടായ നിയമസഭ തെരഞ്ഞെടുപ്പില്‍ വിജയികളായ എല്ലാവരും ഇന്ന് സത്യപ്രതിജ്ഞ ചെയ്യുകയാണ്. ഈ ദിവസം തന്നെയാണ്, കഴിഞ്ഞ അഞ്ചുവര്‍ഷം കേരളത്തെ കരുത്തോടെ നയിച്ച സഖാവ് പിണറായി വിജയന്റെ ജന്‍മദിനവും. ബഹുമാനപ്പെട്ട മുഖ്യമന്ത്രിക്ക് ജന്‍മദിനാശംസകള്‍” വീണാ ജോർജ് ഫേസ്ബുക്ക് പോസ്റ്റിലൂടെ പറഞ്ഞു.
2016ൽ ഒന്നാം പിണറായി വിജയൻ സര്‍ക്കാരിന്‍റെ സത്യപ്രതിജ്ഞയുടെ തലേന്നാണ് മുഖ്യമന്ത്രി മെയ് 24ന് തന്‍റെ പിറന്നാളാണെന്ന് തുറന്നു പറഞ്ഞത്. 1945 മെയ് 24നായിരുന്നു പിണറായി വിജയന്റെ ജനനം.
