“ഒരു കാര്യം മുഖ്യമന്ത്രിയുടെ ശ്രദ്ധയിൽ പെടുത്തിയാൽ അതിനോട് അദ്ദേഹം നല്ല രീതിയിൽ പ്രതികരിക്കും. കേരളത്തിന്റെ മുഖ്യമന്ത്രിയല്ലേ അദ്ദേഹം. പല ഗുണങ്ങളും ഉള്ളതുകൊണ്ടാണല്ലോ അദ്ദേഹം ആ പദവിയിൽ എത്തിയത്. താൻ പ്രമാണിത്തം അദ്ദേഹത്തിന്റെ പ്രവർത്തനങ്ങളിൽ ഉണ്ട്. ഒരു സ്റ്റാലിനിസ്റ്റ് ചുവ. ജനാധിപത്യത്തിന്റെ വഴിയിലെ ഏണിയിലൂടെ കയറി ഏകാധിപത്യത്തിലേക്ക് പോകുന്നത് തടയേണ്ടതുണ്ട്. അതിനു തുനിഞ്ഞാൽ ആ ഏണി തട്ടിമറിച്ചിരിക്കും.” വിഡി സതീശൻ പറഞ്ഞു. മനോരമയ്ക്കു നൽകിയ അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്.
അതേസമയം, “സംഘപരിവാറിന്റെ വിദ്വേഷ രാഷ്ട്രീയത്തിനെതിരെ ആണ് കേരളത്തിന്റെ പൊതുബോധം. ആശയപരമായ പോരാട്ടത്തിലൂടെ ഈ മണ്ണിൽ വർഗീയതയുടെ രാഷ്ട്രീയത്തെ കുഴിച്ചു മൂടുക എന്നതാവും യു.ഡി.എഫിന്റെ പ്രഥമ പരിഗണന. ഞാൻ എന്നും പറഞ്ഞിട്ടുള്ളത് പോലെ വർഗീയതയോടു സന്ധിയില്ലാത്ത സമരം ആണ് എന്റെ രാഷ്ട്രീയം.”
” ന്യൂനപക്ഷ വർഗീയതയും ഭൂരിപക്ഷ വർഗീയതയെയും ഒരു പോലെ എതിർത്തു തോൽപ്പിക്കുന്ന പോരാട്ടം ആവണം നമ്മൾ നടത്തേണ്ടത്. ഒരു സമുദായ സംഘടനയ്ക്കും കീഴ്പ്പെടാതെ നെഹ്രുവിയൻ സോഷ്യലിസത്തിൽ അധിഷ്ഠിതമായ കോൺഗ്രസിന്റെ ആശയങ്ങളിൽ ഊന്നി ഒരു തിരിച്ചു വരവിനുള്ള പ്രവർത്തനമാവും നമ്മൾ മുന്നോട്ടു കൊണ്ടുപോവുക.” അദ്ദേഹം ഫേസ്ബുക്ക് പോസ്റ്റിൽ പറഞ്ഞു.
