മതിൽ തകർന്ന് വീണ് അപകടത്തിൽപ്പെട്ട നായയുടെ ചിത്രവും വിവരവും ഫേസ്‌ബുക്ക് പേജിലൂടെ ശനിയാഴ്‌ച എംഎൽഎ വികെ പ്രശാന്ത് പങ്കുവച്ചിരുന്നു. മതിലിനടിയിൽ പെട്ടുപോയ നായയുടെ ദയനീയ അവസ്ഥയും നായയെ രക്ഷപ്പെടുത്താൻ നടത്തുന്ന ശ്രമങ്ങളുമാണ് പോസ്റ്റ് ചെയ്‌തിരുന്നത്. ഇതിന് പിന്നാലെ നായയുമായി ബന്ധപ്പെട്ട ചോദ്യങ്ങൾ ശക്തമായി. ഇതോടെയാണ് രക്ഷപ്പെട്ട നായയുടെ ദൃശ്യവും പോസ്‌റ്റും പങ്കുവച്ച് എംഎൽഎ വീണ്ടും എത്തിയത്.
കൊവിഡ് പ്രതിരോധ പ്രവർത്തനങ്ങളുടെ ഭാഗമായുള്ള യാത്രക്കിടയിൽ മരുതൻകുഴിക്കും വേട്ടമുക്കിനും ഇടയിൽ വെച്ചാണ് അപകടത്തിൽപ്പെട്ടത് ഫോട്ടോഗ്രാഫര്‍മാരായ പ്രശാന്തും അപ്പുവും നേരിൽ കണ്ടത്. ഇതോടെ കാർ നിർത്തി. വീടിനോട് ചേർന്നുള്ള മതിൽ നായയുടെ ശരീരത്തിലേക്ക് ഇടിഞ്ഞ് വീഴുകയായിരുന്നു.
മതിലിനടയിൽ നായ കുടുങ്ങിക്കിടക്കുന്നുണ്ടെന്ന് വീട്ടുകാർ പറഞ്ഞതോടെ പ്രശാന്തും അപ്പുവും നായയെ രക്ഷിക്കാൻ ശ്രമം ആരംഭിച്ചു. ഇതുവഴി എത്തിയ ഫുഡ് ഡെലിവറി ബോയ്‌സും ഇവരെ സഹായിച്ചു. ഏറെനേരം ശ്രമിച്ചെങ്കിലും സ്ലാബ് നീക്കാനായില്ല. ഫയർഫോഴ്‌സിനെ വിളിച്ചാൽ വിളിച്ച് വരുത്തുന്നതടക്കം ആലോചിച്ചു. ഫയർഫോഴ്‌സ് എത്താൻ ആവശ്യമായ സമയമാണ് ആ ആലോചനയിൽ നിന്നും പിന്തിരിപ്പിച്ചത്. ഇതിനിടെ അപ്പു വാഹനത്തിൽ നിന്നും ജാക്കി പുറത്തെടുത്ത് സ്ലാബിനടയിൽ വച്ച് ലിവറുപയോഗിച്ച് ഉയർത്തി. കൂട്ടായ പരിശ്രമത്തിനൊടുവിൽ നായയെ രക്ഷിക്കുകയും ചെയ്‌തു.
ഈ സംഭവത്തിൻ്റെ ചിത്രങ്ങളാണ് എംഎൽഎ ഫേസ്‌ബുക്കിൽ പങ്കുവച്ചത്. ഇതോടെയാണ് നായയുടെ പരിക്കുമായി ബന്ധപ്പെട്ട ചോദ്യങ്ങളും പിന്നാലെ എത്തിയത്. ഡ്രാവോ Perfect Ok യാണ് – എന്നായിരുന്നു അദ്ദേഹം മറുപടി നൽകിയത്. “ഡ്രാവോ Perfect Ok യാണ്, വൈകുന്നേരം മതിൽ ഇടിഞ്ഞു വീണു പരിക്കേറ്റ ഒരു നായയുടെ പോസ്റ്റ് ഇട്ടിരുന്നു , അതിൽ നായ്ക്ക് പരിക്കെന്തെങ്കിലും ഉണ്ടോ എന്ന് ഒത്തിരിപേർ ചോദിച്ചിരുന്നു … നായ perfect ഓക്കെയാണ്”- എന്ന് അദ്ദേഹം ഫേസ്‌ബുക്കിലൂടെ വ്യക്തമാക്കി.
