ന്യൂനപക്ഷക്ഷേമ വകുപ്പ് മുഖ്യമന്ത്രി ഏറ്റെടുത്തതിനെ എല്ലാവരും സ്വാഗതം ചെയ്തതായാണ് കണ്ടതെന്ന് പിണറായി വിജയൻ വിശദീകരിച്ചു. ഏതെങ്കിലും കൂട്ടര്‍ക്ക് ഇതിൽ ആശങ്കയുള്ളതായി തോന്നുന്നില്ല. മുസ്ലീം ലീഗല്ല വകുപ്പ് തീരുമാനിക്കുന്നതെന്നും മുസ്ലീം വിഭാഗത്തിൻ്റെ അട്ടിപ്പേറവകാശം ലീഗിനല്ലെന്നും മുഖ്യമന്ത്രി വ്യക്തമാക്കി.
Also Read:
എന്നിലും സര്‍ക്കാരിലും മുസ്ലീം വിഭാഗത്തിനു വിശ്വാസമുണ്ടെന്ന് എല്ലാവര്‍ക്കും അറിയാമെന്ന് മുഖ്യമന്ത്രി പറഞ്ഞു. നീക്കത്തിനു പിന്നിൽ സഭാനേതൃത്വത്തിൻ്റെ ആവശ്യമല്ലെന്നും പൊതുവിലുള്ള ആലോചനയുടെ ഭാഗമായാണ് ഈ തീരുമാനം എടുത്തതെന്നും മുഖ്യമന്ത്രി പറഞ്ഞു. മുൻപ് കെടി ജലീലായിരുന്നു വകുപ്പ് കൈകാര്യം ചെയ്തിരുന്നത്. ന്യൂനപക്ഷക്ഷേമവും പ്രവാസികാര്യവും മികച്ച രീതിയിൽ കൈകാര്യം ചെയ്യാവുന്നതാണെന്ന ചിന്തയിലാണ് മുഖ്യമന്ത്രി തന്നെ ആ വകുപ്പുകള്‍ ഏറ്റെടുക്കാൻ തീരുമാനിച്ചതെന്നും മുഖ്യമന്ത്രി വിശദീകരിച്ചു.
Also Read:
അതേസമയം, തൊട്ടുപിന്നാലെ മറുപടിയുമായി പി കെ കുഞ്ഞാലിക്കുട്ടി രംഗത്തെത്തി. മുഖ്യമന്ത്രിയുടെ നടപടി ഒരു പ്രത്യേക വിഭാഗത്തെ അപമാനിക്കുന്നതാണെന്നായിരുന്നു കുഞ്ഞാലിക്കുട്ടിയുടെ ആരോപണം. ഒരു മന്ത്രിയ്ക്ക് നല്‍കിയ വകുപ്പ് തിരിച്ചെടുക്കുന്നത് ശരിയായ നടപടിയല്ലെന്നും ഇത് സമുദായത്തെ അപമാനിക്കുന്നതിനു തുല്യമാണെന്നും കുഞ്ഞാലിക്കുട്ടി പറഞ്ഞു. ഏതു വകുപ്പ് കൊടുക്കുന്നു എന്നല്ല, കൊടുത്ത വകുപ്പ് തിരിച്ചെടുക്കുന്നതാണ് പ്രശ്നമെന്നും അദ്ദേഹം വ്യക്തമാക്കി.
