തിരുവനന്തപുരം: നേതാവിന്റെ വിവാഹ ചടങ്ങിൽ അഞ്ഞൂറ് പേരെ പങ്കെടുപ്പിക്കാൻ അപേക്ഷയുമായി യൂത്ത് കോൺഗ്രസ്. യൂത്ത് കോൺഗ്രസ് ജില്ലാ വൈസ് പ്രസിഡന്റായ മുട്ടപ്പലം സജിത്ത് തന്റെ വിവാഹ ചടങ്ങിലേക്ക് അഞ്ഞൂറ് ക്ഷണിതാക്കളെ പങ്കെടുപ്പിക്കുന്നതിനുള്ള അനുമതിക്കായാണ് ചിറയിൻകീഴ് എസ്ഐ നൗഫലിനെ കണ്ട് അപേക്ഷ സമ‍ര്‍പ്പിച്ചത്.
സമൂഹിക അകലം പാലിച്ച് ക്ഷണിതാക്കൾക്ക് ഇരിക്കാനുള്ള സൗകര്യം ക്ഷേത്ര മൈതാനത്ത് ഒരുക്കിയ ശേഷം കൊറോണയുമായി ബന്ധപ്പെട്ട എല്ലാ നടപടി ക്രമങ്ങളും പാലിക്കാമെന്നും അപേക്ഷയിൽ പറയുന്നു. മുഖ്യമന്ത്രിക്കും മറ്റ് മന്ത്രിമാ‍ര്‍ക്കുമുള്ള അവകാശം ഗ്രാമപഞ്ചായത്ത് ഭരണ സമിതി അംഗവും ജനപ്രതിനിധിയുമായ തനിക്കുമുണ്ടെന്ന് സജിത്ത് പറയുന്നു.
സത്യപ്രതിജ്ഞാ ചടങ്ങിന് സംസ്ഥാന സ‍ര്‍ക്കാര്‍ പാലിച്ചിട്ടുള്ള എല്ലാ നടപടി ക്രമങ്ങളും പാലിക്കാമെന്ന ഉറപ്പും അപേക്ഷയിലുണ്ട്. സെൻട്രൽ സ്റ്റേഡിയത്തേക്കാൾ വലുപ്പവും വിസ്താരവുമുള്ള ശാ‍ര്‍ക്കര മൈതാനത്ത് പന്തൽ കെട്ടി വിവാഹം നടത്താനാകും എന്നാണ് അപേക്ഷയിൽ പറയുന്നത്. ജൂൺ 15നാണ് വിവാഹം.
