പുതുയുഗ പിറവിക്ക് തുടക്കം കുറിക്കുന്ന സത്യപ്രതിജ്ഞാ ദിനത്തിൽ കൊവിഡ് മാനദണ്ഡങ്ങൾ പാലിച്ച് കുടുംബാംഗങ്ങൾ അഭിമാനപൂർവ്വം സന്തോഷം പങ്കിടാൻ തയ്യാറാകണമെന്ന് എ വിജയരാഘവൻ ആഹ്വാനം ചെയ്തു. സത്യപ്രതിജ്ഞാ ദിവസം വഴിയോരങ്ങളിൽ ആഹ്ലാദം അലയടിക്കേണ്ടതാണ്. എന്നാൽ ഇന്നത്തെ ദൗ‍ര്‍ഭാഗ്യകരമായ സാഹചര്യം അതിന് അനുവദിക്കുന്നില്ല. അതുകൊണ്ട് ഗൃഹാങ്കണങ്ങളിൽ ആഹ്ലാദം അലയടിക്കണമെന്ന് എൽഡിഎഫ് കൺവീന‍ര്‍ പറഞ്ഞു.
പ്രതിപക്ഷം ഭരണഘടനാപരമായ ബാധ്യത നിറവേറ്റുന്നതിൽ അസൂയപൂണ്ടിരിക്കുകയാണ്. എൽഡിഎഫിന്റെ ഭരണത്തുട‍ര്‍ച്ച അവര്‍ക്ക് സഹിക്കാൻ കഴിയുന്നതല്ല. അതാണ് സത്യപ്രതിജ്ഞ ബഹിഷ്കരിക്കാൻ അവരെ പ്രേരിപ്പിച്ചിരിക്കുന്നത്. മുൻ പ്രതിപക്ഷ നേതാവിന് മുഖ്യമന്ത്രിയാകാൻ കഴിഞ്ഞില്ലെന്നുവെച്ച് സത്യപ്രതിജ്ഞ നടത്താതിരിക്കാൻ കഴിയില്ലെന്നും വിജയരാഘവൻ കൂട്ടിച്ചേ‍ര്‍ത്തു.
ക്ഷണിക്കപ്പെട്ട അഞ്ഞൂറോളം ആളുകൾ സത്യപ്രതിജ്ഞാ ചടങ്ങിൽ എത്തുമെന്നാണ് സ‍ര്‍ക്കാര്‍ വ്യക്തമാക്കിയിരിക്കുന്നത്. നിയുക്ത മന്ത്രിമാര്‍ക്കും ഗവര്‍ണ‍ര്‍ക്കും സത്യപ്രതിജ്ഞ വേദിയിൽ സാമൂഹിക അകലം പാലിച്ചിരിക്കാൻ സൗകര്യം ഒരുക്കിയിട്ടുണ്ട്. അതിഥികൾക്കായി രണ്ട് പന്തലും ഒരുക്കിയിട്ടുണ്ട്. ഇവിടെയുള്ള സ്ക്രീനിലൂടെ സത്യപ്രതിജ്ഞയ്ക്ക് സാക്ഷികളാകാം.
