മെയ് 11നായിരുന്നു ഇസ്രയേലിലെ ജനവാസകേന്ദ്രങ്ങള്‍ ലക്ഷ്യമാക്കി ഹമാസ് നടത്തിയ റോക്കറ്റ് ആക്രമണത്തിൽ സൗമ്യ സന്തോഷ് (30) കൊല്ലപ്പെട്ടത്. കഴിഞ്ഞ പത്ത് വര്‍ഷമായി ഇസ്രയേലിൽ കെയര്‍ ഗിവറായി ജോലി ചെയ്യുകയായിരുന്നു സൗമ്യ. മെയ് 11ന് ഭര്‍ത്താവുമായി ഫോണിൽ സംസാരിക്കുന്നതിനിടെയായിരുന്നു ഇവര്‍ താമസിക്കുന്ന അപ്പാര്‍ട്ട്മെൻ്റിൽ റോക്കറ്റ് പതിച്ചത്. വീഡിയോ കോളിനിടെ സ്ഥലത്ത് ആക്രമണം നടക്കുകയാണെന്നും തൊട്ടടുത്തുള്ള സുരക്ഷിത ബങ്കറിലേയ്ക്ക് മാറുകയാണെന്നും സൗമ്യ അറിയിച്ചിരുന്നു. തൊട്ടുപിന്നാലെ സ്ഥോടനമുണ്ടായതായും സ്ക്രീനിൽ പുകപടലങ്ങള്‍ നിറഞ്ഞതായും സന്തോഷ് പറയുകയായിരുന്നു. മണിക്കൂറുകള്‍ക്കു ശേഷമാണ് സൗമ്യയുടെ മരണം സ്ഥിരീകരിക്കപ്പെട്ടത്.
Also Read:
15 മിനിട്ടോളം സംഭാഷണം നീണ്ടുനിന്നതായാണ് മനോരമ റിപ്പോര്‍ട്ടിൽ പറയുന്നത്. സന്തോഷിനോടും മകൻ അഡോണിനോടും ഇസ്രയേലിലെ മുഴുവൻ ജനങ്ങളുടെയും പേരിൽ അനുശോചനം അറിയിക്കുന്നതായി പ്രസിഡൻ്റ് അറിയിച്ചു. കുടുംബത്തെ സംരക്ഷിക്കുമെന്ന് പ്രസിഡൻ്റ് ഉറപ്പു നല്‍കിയെന്നും റിപ്പോര്‍ട്ടിൽ പറയുന്നു. സൗമ്യ മരിച്ച സ്ഥലം കാണണമെന്നു പറഞ്ഞപ്പോള്‍ എപ്പോള്‍ വേണമെങ്കിലും അതിനു സൗകര്യമൊരുക്കാമെന്നും അവിടെയെത്തുമ്പോള്‍ നേരിട്ടു കാണാമെന്നും റൂവിൻ റിവ്ലിൻ ഉറപ്പു നല്‍കിയെന്നാണ് ഇടുക്കിയിൽ നിന്നുള്ള റിപ്പോര്‍ട്ടിൽ പറയുന്നത്. ഇസ്രയേൽ കോൺസുലേറ്റിലെ മലയാളി ഉദ്യോഗസ്ഥനായിരുന്നു ഇരുവര്‍ക്കും വേണ്ടി സംഭാഷണം മൊഴിമാറ്റം ചെയ്തത്. സൗമ്യയ്ക്ക് അന്ത്യോപചാരം അര്‍പ്പിക്കാനായി കീരിത്തോട്ടിലെ വീട്ടിലെത്തിയ ഇസ്രയേൽ കോൺസുലേറ്റ് ജനറൽ ജൊനാഥൻ സഡ്കയും 15 മിനിട്ടോളം നീണ്ട ഫോൺ കോളിൽ ഉണ്ടായിരുന്നു.
Also Read:
ഇസ്രയേൽ പ്രസിഡൻ്റ് സൗമ്യയുടെ ഭര്‍ത്താവുമായി ഫോണിൽ ബന്ധപ്പെട്ട വിവരം വാര്‍ത്താ ഏജൻസിയായ പിടിഐയും സ്ഥിരീകരിച്ചിട്ടുണ്ട്. ഫോൺ സംഭാഷണം നടന്നതായി പ്രസിഡൻ്റിൻ്റെ ഉപദേശകരൻ സ്ഥിരീകരിച്ചതായും എന്നാൽ വിശദവിവരങ്ങള്‍ ലഭ്യമല്ലെന്നുമാണ് പിടിഐ റിപ്പോര്‍ട്ടിലുള്ളത്.
മെയ് 14ന് പ്രത്യേക വിമാനത്തിൽ ഇസ്രയേലിൽ നിന്നയച്ച മൃതദേഹം പിറ്റേന്ന് കേരളത്തിലെത്തിച്ച് സംസ്കരിക്കുകയായിരുന്നു. ഇസ്രയേൽ അംബാസഡര്‍ റോൺ മോള്‍ക്കയും കഴിഞ്ഞ ദിവസം കുടുംബവുമായി സംസാരിച്ച് അനുശോചനം അറിയിച്ചിരുന്നു.
