തിരുവനന്തപുരം
താഴെത്തട്ടിൽനിന്ന് ത്യാഗപൂർണമായ പ്രവർത്തനത്തിലൂടെ വിപ്ലവ പ്രസ്ഥാനത്തിന്റെ നായകസ്ഥാനത്തേക്ക് ഉയർന്നതാണ് പിണറായി വിജയനെന്ന കമ്യൂണിസ്റ്റിന്റെ ജീവിതം. എംഎൽഎ, മന്ത്രി, സിപിഐ എം സംസ്ഥാന സെക്രട്ടറി എന്നീ നിലകളിൽ വ്യക്തിമുദ്ര പതിപ്പിച്ചശേഷമാണ് 2016ൽ പിണറായി വിജയൻ കേരളത്തിന്റെ 22–ാമത്തെ മുഖ്യമന്ത്രിയായത്. മികച്ച ഭരണാധികാരിയെന്ന് അടിവരയിട്ട് തെളിയിച്ചശേഷമാണ് ചരിത്രംകുറിച്ച ഈ രണ്ടാം ദൗത്യം.
കഴിഞ്ഞതവണ പിണറായി മുഖ്യമന്ത്രിയായപ്പോൾ നെറ്റി ചുളിച്ചവർപോലും പിന്നീട് ആ ഭരണമികവിനെ തുറന്ന മനസ്സോടെ അംഗീകരിച്ചു. രണ്ടു പ്രളയും കോവിഡ് മഹാമാരിയും കടന്നുവന്നെങ്കിലും പ്രതിസന്ധിയിൽ കുലുങ്ങിയില്ല. നാടും ജനങ്ങളും ദുരിതത്തിലാഴ്ന്നിറങ്ങിയപ്പോൾ പതറിപ്പോകരുതെന്ന മന്ത്രവുമായി ആശ്വാസത്തിന്റെ നെയ്ത്തിരി കത്തിച്ചുപിടിച്ച് മുന്നിൽനിന്ന് നയിച്ചു. അതാണ് പിണറായി എന്ന ജനനായകനെ മറ്റുള്ളവരിൽനിന്ന് വേറിട്ടതാക്കുന്നത്.
1996–-98ൽ വൈദ്യുതി മന്ത്രിയായ പിണറായി കേരളത്തിന്റെ വൈദ്യുതി പ്രതിസന്ധി പരിഹരിക്കാൻ ചടുലമായ ഇടപെടലുകളാണ് നടത്തിയത്. അദ്ദേഹത്തെ മികച്ച മന്ത്രി എന്നാണ് മാധ്യമങ്ങൾ വിശേഷിപ്പിച്ചത്. 1998ൽ പാർടി നേതൃസ്ഥാനത്തേക്ക് വന്നപ്പോൾ അപവാദങ്ങളുടെ ചക്രവ്യൂഹം തീർത്ത് തീർത്തുകളയാനാണ് രാഷ്ട്രീയ എതിരാളികൾ ശ്രമിച്ചത്. പക്ഷേ, രാഷ്ട്രീയ ശത്രുക്കൾ അന്ന് ഭയന്നതുപോലെ തന്നെ സംഭവിച്ചു. എൽഡിഎഫിന് ഭരണത്തുടർച്ച യാഥാർഥ്യമാക്കിയാണ് പിണറായി തലയുയർത്തി നിൽക്കുന്നത്.
മുഖ്യമന്ത്രി പിണറായി വിജയനും ഭാര്യ കമലയും കുടുംബത്തോടൊപ്പം
