വാക്സിൻ: ആഗോള ടെൻഡർ നടപടി ഇന്ന് തുടങ്ങും; മൂന്നു കോടി ഡോസ് വാങ്ങുമെന്ന് മുഖ്യമന്ത്രി

തിരുവനന്തപുരം: കൊവിഡ് വാക്സിൻ വാങ്ങാനുള്ള ആഗോള ടെൻഡർ നടപടി ഇന്ന് തുടങ്ങുമെന്ന് മുഖ്യമന്ത്രി . കേരളം മൂന്ന് കോടി വാക്സിൻ വാങ്ങുമെന്ന് അദ്ദേഹം പറഞ്ഞു. ഗർഭിണികൾക്കും മുലയൂട്ടുന്നവർക്കും വാക്സിൻ നൽകാൻ ഐസിഎംആറിന്റെ നിർദ്ദേശം തേടുമെന്നും മുഖ്യമന്ത്രി വാർത്താ സമ്മേളനത്തിൽ പറഞ്ഞു.

നിലവിൽ ഗർഭിണികൾക്കും മുലയൂട്ടുന്നവർക്കും വാക്സിൻ നൽകുന്നില്ല. അവരിൽ വാക്സിൻ പരീക്ഷണം നടത്താത്തതിനാലാണ് അത്. അവർക്ക് വാക്സിൻ നൽകുന്നതിൽ കുഴപ്പമില്ലെന്നാണ് വിദഗ്ദർ പറയുന്നത്. ഇന്ത്യൻ നാഷ്ണൽ ടെക്സിക്കൽ അഡ്വൈസറി ഗ്രൂപ്പും നീതി ആയോഗും ഇക്കാര്യത്തിൽ ശുപാർശ നൽകിയിട്ടുണ്ട്. അതിനാൽ വാക്സിൻ നൽകാൻ ഐസിഎംആറിന്റെ ഉപദേശം തേടുമെന്നും അദ്ദേഹം പറഞ്ഞു.

കൊവിഡ് മൂലം ഗർഭിണികളിൽ കൃത്യമായ പരിശോധന നടത്താൻ കഴിയാത്ത അവസ്ഥയുണ്ട്. രക്തത്തിലെ ഗ്ലൂക്കോസ്, രക്തസമ്മർദ്ദം എന്നിവ വാർഡ് സമിതി ആശാവർക്കർമാരെ മുൻനിർത്തി പരിശോധിക്കുമെന്നും മുഖ്യമന്ത്രി വ്യക്തമാക്കി.

18 മുതൽ 44 വയസ് വരെയുള്ളവർക്ക് വാക്സിനേഷൻ നടപടികൾ ആരംഭിച്ചു. ഗുരുതര രോഗമുള്ളവർക്കാണ് ആദ്യ ഘട്ടത്തിൽ വാക്സിൻ നൽകുന്നത്. വാക്സിനായി അപേക്ഷിക്കുന്നവർ തെറ്റ് കൂടാതെ അപേക്ഷ സമർപ്പിക്കണം. ചില പരാതികളും പ്രായോഗിക പ്രശ്നങ്ങളും ഇക്കാര്യത്തിൽ ഉന്നയിക്കപ്പെട്ടിട്ടുണ്ടെന്നും അവ പരിശോധിക്കുമെന്നും മുഖ്യമന്ത്രി പറഞ്ഞു.