ഓൺലൈൻ മുഖേനെ രജിസ്‌റ്റർ ചെയ്‌തവർക്ക് മാത്രമായിരിക്കും വാക്‌സിൻ നൽകുക. വാക്‌സിൻ വിതരണ കേന്ദ്രങ്ങളില്‍ 18മുതൽ 45 വയസ് വരെയുള്ള വിഭാഗത്തിന് പ്രത്യേകം ക്യൂ ഉണ്ടാകും. മുൻഗണനാ ഗ്രൂപ്പുകൾക്കായിരിക്കും വില കൊടുത്ത് വാങ്ങിയ വാക്‌സിൻ ആദ്യം നൽകുക. വാക്‌സിൻ്റെ ദൗർലഭ്യമാണ് ഇതിന് കാരണം. കൊവിഡ് ബാധിച്ചാൽ ആരോഗ്യനില കൂടുതൽ ഗുരുതരമാകുന്നവർക്കാകും പ്രധാന പരിഗണന. ഇവർക്കായി വാക്‌സിൻ വിതരണ കേന്ദ്രങ്ങളിൽ പ്രത്യേക കൗണ്ടറുകൾ സ്ഥാപിക്കും.
ഗുരതര രോഗമാണെന്ന് വ്യക്തമാക്കുന്ന ഡോക്‌ടർ സാക്ഷ്യപ്പെടുത്തിയ രേഖകൾ ഹാജരാക്കി വേണം ആദ്യ നടപടികൾ പൂർത്തിയാക്കാൻ. ജില്ലാ തലത്തിൽ അപേക്ഷകൾ പരിശോധിച്ച് അറിയിപ്പ് ലഭിച്ചവർക്ക് മാത്രമാണ് നാളെ മുതൽ (17-05-2021) വാക്‌സിൻ കുത്തിവെപ്പ് ലഭ്യമാകുന്ന കേന്ദ്രങ്ങളിൽ ഏത്തേണ്ടത്. സെക്കൻഡ് ഡോസ് വാക്‌സിനായി കാത്തിരിക്കുന്ന മറ്റ് വിഭാഗക്കാർക്ക് ഓൺലൈൻ രജിസ്‌ട്രേഷൻ എർപ്പെടുത്തുന്നതോടെ സ്‌പോട്ട് രജിസ്‌ട്രേഷൻ ഇല്ലാതാകും.
അതേസമയം, വിദേശ കമ്പനികള്‍ ഇന്ത്യക്ക് പുറത്തു നിര്‍മിക്കുന്ന കൊവിഡ് പ്രതിരോധ വാക്സിനുകള്‍ കേരള സര്‍ക്കാര്‍ നേരിട്ടു വാങ്ങുമെന്ന് മുഖ്യമന്ത്രി പിണറായി വിജയൻ വ്യക്തമാക്കി. ഇതിനായുള്ള നടപടികള്‍ അതിവേഗത്തിൽ നീങ്ങിക്കൊണ്ടിരിക്കുകയാണെന്ന് അദ്ദേഹം പറഞ്ഞു. കൊവിഡ് അവലോകന യോഗത്തിന് ശേഷം നടന്ന വാർത്താസമ്മേളനത്തിലാണ് മുഖ്യമന്ത്രി ഇക്കാര്യം പറഞ്ഞത്. കര്‍ണാടകയും തമിഴ്നാടും ഉള്‍പ്പെടെയുള്ള സംസ്ഥാനങ്ങള്‍ കൊവിഡ് വാക്സിനു വേണ്ടി ആഗോള ടെൻഡര്‍ വിളിച്ചതു സംബന്ധിച്ച് ചോദ്യത്തിനായിരുന്നു മുഖ്യമന്ത്രിയുടെ മറുപടി.
