സത്യപ്രതിജ്ഞാ ചടങ്ങിൽ 750 പേരെ പങ്കെടുപ്പിക്കുമെന്ന റിപ്പോർട്ടുകളാണ് മുൻപ് പുറത്തുവന്നത്. ചടങ്ങിൽ പങ്കെടുക്കേണ്ട ആളുകളുടെ എണ്ണം പരമാവധി കുറയ്‌ക്കുമെന്ന് മുഖ്യമന്ത്രി പിണറായി വിജയൻ ശനിയാഴ്‌ച വ്യക്തമാക്കിയിരുന്നു. വളരെ കുറച്ച് ആളുകൾ മാത്രമേ ചടങ്ങിൽ പങ്കെടുക്കൂ എന്നും വിശദാംശങ്ങൾ അറിയിക്കുമെന്നുമാണ് കൊവിഡ് അവലോകന യോഗത്തിന് ശേഷം നടന്ന പത്രസമ്മേളനത്തിൽ മുഖ്യമന്ത്രി പറഞ്ഞത്. നാല് ജില്ലകളിൽ ഇന്ന് അർധരാത്രി മുതൽ ട്രിപ്പിൾ ലോക്ക്‌ഡൗൺ നിലവിൽ വരും. കൊവിഡ് കേസുകൾ ഉയർന്ന തോതിലുള്ള എറണാകുളം, മലപ്പുറം, തൃശൂർ, തിരുവനന്തപുരം ജില്ലകളാണ് അടച്ചിടുന്നത്.
മെയ് 20ന് തിരുവനന്തപുരം സെൻട്രൽ സ്റ്റേഡിയത്തിലാണ് സർക്കാരിൻ്റെ സത്യപ്രതിജ്ഞ ചടങ്ങ് നടക്കുകയെന്നാണ് റിപ്പോർട്ട്. സ്റ്റേഡിയത്തിൽ പന്തലടക്കമുള്ള സൗകര്യങ്ങൾ ഒരുക്കുന്നതിന്‍റെ പണികൾ പുരോഗമിക്കുകയാണ്. കൊവിഡ് രണ്ടാം തരംഗം രൂക്ഷമായ സാഹചര്യത്തിൽ കൊവിഡ് പ്രോട്ടോകോൾ പ്രകാരമാകും സത്യപ്രതിജ്ഞാ ചടങ്ങുകൾ സംഘടിപ്പിക്കുന്നത്. മുൻകൂട്ടി അറിയിച്ചവർക്ക് മാത്രമാകും ഇവിടേക്ക് പ്രവേശനം. പൊതുജനങ്ങൾക്ക് പ്രവേശനം അനുവദിക്കാൻ ഇടയില്ല.
സത്യപ്രതിജ്ഞ ചടങ്ങ് മെയ് 20ന് നടക്കാനിരിക്കെ മുഖ്യമന്ത്രി രാജ്ഭവനിലെത്തി ഗവർണറെ കണ്ടിരുന്നു. സർക്കാർ രൂപീകരണത്തിനായി അവകാശവാദം ഉന്നയിച്ചു കൊണ്ട് ഗവർണർ ആരിഫ് മുഹമ്മദ് ഖാന് ഔദ്യോഗികമായി കത്ത് നൽകി. അടുത്ത ദിവസം ചേരുന്ന എൽഡിഎഫ് യോഗം പിണറായി വിജയനെ മുഖ്യമന്ത്രിയായി ഔദ്യോഗികമായി തെരഞ്ഞെടുക്കും.
