ഓർഡർ ചെയ്തത് മൗത്ത്‌വാഷ്, കിട്ടിയത് റെഡ്‌മിയുടെ പുത്തൻ ഫോൺ! അമ്പട ഭാഗ്യവാനേ

കൊറോണ കാലവും, ലോക്ക് ഡൗണുമൊക്കെ ആയതോടെ ഓൺലൈൻ ഡെലിവറിയാണ് ഇപ്പോൾ പൊതുജനങ്ങൾക്ക് ആശ്രയം. മൊട്ടു സൂചി മുതൽ മോട്ടോർ കാർ വരെയും അതിലപ്പുറവും ഇപ്പോൾ ഓൺലൈൻ ആയി ഓർഡർ ചെയ്യാം. എത്രയും പെട്ടന്ന് ഓർഡർ ചെയ്ത സംഭവം നമ്മുടെ വീട്ടുപടിക്കൽ എത്തും. ഇ-കോമേഴ്‌സ് വെബ്‌സൈറ്റുകളായ ആമസോൺ, ഫ്ലിപ്കാർട്ട് എന്നിവയാണ് ഇക്കാര്യത്തിൽ മുന്നിൽ. പക്ഷെ ഓൺലൈൻ ഡെലിവറിയിൽ ചില പ്രശ്നനങ്ങളുമുണ്ട്. ചിലർ ഓർഡർ ചെയ്ത കാര്യങ്ങൾ ആവില്ല ഒടുവിൽ കയ്യിൽ കിട്ടുമ്പോൾ. പലപ്പോഴും പാക്കജിങ്ങിലെ തെറ്റുകളാണ് ഈ പ്രശ്നം സൃഷ്ടിക്കാറുള്ളത്. ചിലപ്പോൾ ചതിക്കപ്പെടാനും സാധ്യതയുണ്ട്. കേട്ടിട്ടില്ലേ ഐഫോൺ ഓർഡർ ചെയ്തപ്പോൾ ഇഷ്ടിക കട്ട കിട്ടി എന്നൊക്കെ.

എന്നാൽ എല്ലാവർക്കും ഇത്തരത്തിൽ അല്ല തെറ്റായ ഡെലിവറി ലഭിക്കുക. ചില ഭാഗ്യവാന്മാരുണ്ട്. ഉദാഹരണത്തിന് മുംബൈയിൽ താമസിക്കുന്ന ലോകേഷ് ദാഗ. ആമസോണിലൂടെ കോൾഗേയ്റ്റിന്റെ ഓർഡർ ചെയ്തതാണ് കക്ഷി. ഡെലിവറി കിട്ടിയ പാക്കറ്റ് തുറന്നു നോക്കിയപ്പോൾ ഷഓമി അടുത്തിടെ വിപണിയിലെത്തിച്ച 11,999 രൂപ വിലയുള്ള റെഡ്മി നോട്ട് 10. ഇതിലും വലിയ ഭാഗ്യവാനുണ്ടോ?

എങ്കിലും തൻ ഓർഡർ ചെയ്യാത്ത സംഭവം തിരികെ ഏല്പിക്കാൻ ലോകേഷ് ദാഗ തീരുമാനിച്ചു. പക്ഷെ അവിടെയും പ്രശ്നം. മൗത്ത്‌വാഷ് നിത്യോപയോഗ വസ്തുക്കളുടെ കൂട്ടത്തിൽ പെടുന്നതിനാൽ ആപ്പിലെ റിട്ടേൺ ക്ലിക്ക് ചെയ്ത് തിരികെ അയക്കാൻ പറ്റില്ല. ഇതോടെ ലോകേഷ് ദാഗ തനിക്ക് കിട്ടിയ ഫോണിന്റെ ചിത്രം സഹിതം ട്വിറ്ററിൽ ആമസോണിനെ ടാഗ് ചെയ്തു പോസ്റ്റിട്ടു. ഓർഡർ ഐഡി തുടങ്ങിയ വിവരങ്ങളും അടക്കം പോസ്റ്റ് ചെയ്ത ട്വീറ്റിൽ റെഡ്മി നോട്ട് 10 ഓർഡർ ചെയ്തത് ഹൈദരാബാദിലെ ഒരു സ്ത്രീ ആണ് എന്ന ബില്ലിങ് അഡ്രസ്സും ചേർത്തിട്ടുണ്ട്.

അധികം താമസമില്ലാതെ ലോകേഷ് ദാഗയുടെ ട്വീറ്റ് വൈറലായി. ഇത്രയും ഭാഗ്യവും സത്യസന്ധതയും ഉള്ള ഒരു മനുഷ്യനെ കണ്ടെത്തുക പ്രയാസം എന്നുള്ള രീതിയിലാണ് പ്രതികരണങ്ങളിൽ ഏറെയും. റെഡ്മി ഇന്ത്യയുടെ ട്വിറ്റെർ ഹാൻഡിലും ഒടുവിൽ പ്രതികരണവുമായെത്തി. “ഈ ലോക്ക് ഡൗൺ കാലത്ത് മൗത്ത്‌വാഷ് ഇല്ലാതെയും നിങ്ങൾക്ക് ഒരുദിവസം തള്ളി നീക്കാം. പക്ഷെ, റെഡ്മി നോട്ട് 10 ഇല്ലാതെ ഒരു ദിവസം മുന്നോട്ട് കൊണ്ടുപോവാൻ സാധിക്കുമോ?” എന്നാണ് ഷഓമിയുടെ ട്വീറ്റ്.