കണ്ണൂർ ജില്ലയിലെ കണ്ണപുരം ഇരിണാവിലെ ഒരു കക്ഷി ഇ-പാസ്സിനായി അപേക്ഷിച്ചിരിക്കുന്നതിനുള്ള കാരണം പറഞ്ഞിരിക്കുന്നത് സെക്‌സിനായി പുറത്ത് പോകണം എന്നാണ്. കണ്ണൂർ പട്ടണത്തിലേക്കാണ് പോകേണ്ടതും എന്നും രേഖപെടുത്തിയിട്ടുണ്ട്. അനുദിനം ധാരാളം അപേക്ഷകൾ ലഭിക്കാറുണ്ടെങ്കിലും ഈ ആവശ്യം കേട്ട് കൗതുകം തോന്നിയ വളപട്ടണം പോലീസ് അഡ്രസ് തേടി പിടിച്ച് യുവാവിനെ സ്റ്റേഷനിലേക്ക് വിളിച്ചു വരുത്തി ചോദ്യം ചെയ്‌തു. അതെ സമയം അക്ഷരത്തെറ്റാണ് സംഭവിച്ചത് എന്നും 6 മണിക്ക് പുറത്ത് പോവണം എന്നാണ് ഉദ്ദേശിച്ചത് എന്നും യുവാവ് വ്യക്തമാക്കിയതായി കേരളം കൗമുദി റിപ്പോർട്ട് ചെയ്യുന്നു. six o’clock എന്നതിന് പകരം ടൈപ്പ് ചെയ്തത് go for sex എന്നായിപ്പോയി എന്നാണ് വിശദീകരണം. ചെയ്ത തെറ്റിന് മാപ്പ് പറഞ്ഞതോടെ തടി കേടാകാതെ യുവാവിനെ വിട്ടയച്ചു.
ഇതാദ്യമായല്ല നിസ്സാരമായ കാര്യങ്ങൾക്കായി ഇ-പാസ് അപേക്ഷകൾ ലഭിക്കുന്നത്. പെരുന്നാളിന് ഡ്രസ്സ് വാങ്ങാൻ പോകണം, പൊട്ടിയ ചെരിപ്പ് തുന്നാൻ പോകണം, മുഖക്കുരു മാറാനുള്ള ക്രീം വാങ്ങാൻ പോകണം എന്നിങ്ങനെയെയാണ് ബഹുഭൂരിപക്ഷം അപേക്ഷകളും. അയാൾ സംസ്ഥാനമായ കർണാടകയിൽ നിന്നുള്ള ഇ-പാസ് അപേക്ഷയും ഏറെ രസകരമാണ്. ഭാര്യയെ അവളുടെ മാതാപിതാക്കളുടെ അടുത്തേക്ക് കൊണ്ടുചെന്നാക്കണം എന്നാണ് ഒരാളുടെ കാരണം. ഇതാണോ ഇത്ര വലിയ കാര്യം എന്ന് പോലീസ് ചോദിച്ചപ്പോൾ താനും ഭാര്യയും സ്ഥിരം വാഴക്കാണെന്നും ലോക്ക് ഡൗൺ തീരുന്നതുവരെ ഒരു വീട്ടിൽ കഴിയാൻ പറ്റില്ല എന്നുമാണ് യുവാവിന്റെ വിശദീകരണം.
