കേരള രാഷ്ട്രീയത്തിൽ സ്ത്രീപ്രാതിനിധ്യം കുറവായ സമയത്ത് കടന്നുവന്ന ഗൗരിയമ്മ പാർട്ടിയുടെ പ്രവർത്തനങ്ങളിൽ സജീവമായിരുന്നു. കേരളത്തിലെ കാർഷിക പരിഷ്കരണം ഉൾപ്പെടെയുള്ള നിരവധി പുരോഗമനപരമായ നിയമനിർമ്മാണങ്ങൾ ഉണ്ടാക്കുന്നതിൽ പങ്കുവഹിച്ചു. നിയമസഭയിൽ ഉൾപ്പെടെ ഗൗരിയമ്മയ്ക്കൊപ്പം പ്രവർത്തിക്കാൻ അവസരം ലഭിച്ചിട്ടുണ്ട്. ഈ ഘട്ടത്തിലെല്ലാം സമൂഹത്തിൻ്റെ പുരോഗതി ലക്ഷ്യം വെച്ച് നിയമനിർമ്മാണം ആവശ്യമാണെന്ന് പറഞ്ഞ നേതാവാണ് അവരെന്നും സിപിഐ സംസ്ഥാന സെക്രട്ടറി പറഞ്ഞു.
പാർട്ടിയിൽ നിന്നും വിട്ട് നിന്നപ്പോഴും ഗൗരിയമ്മയുമായി അടുത്ത ബന്ധം പുലർത്താൻ കഴിഞ്ഞിട്ടുണ്ട്. അവരുടെ വേർപാടിൽ കമ്മ്യൂണിസ്റ്റ് പാർട്ടിയുടെ ദുഖവും അനുശേചനവും രേഖപ്പെടുത്തുകയാണെന്നും കാനം വ്യക്തമാക്കി.
കടുത്ത അണുബാധയെത്തുടർന്ന് ചികിത്സയിലിരിക്കെ സ്വകാര്യ ആശുപത്രിയിൽ വെച്ചായിരുന്നു ഗൗരിയമ്മയുടെ (102) മരണം. ഇന്ന് രാവിലെ ഏഴ് മണിയോടെയായിരുന്നു അന്ത്യം. കേരളത്തിലെ ആറു മന്ത്രിസഭകളിൽ അംഗമായിരുന്ന ഗൗരിയമ്മ സംസ്ഥാനത്തെ ആദ്യ വനിതാ മന്ത്രി യുമായിരുന്നു. വാര്ധക്യസഹജമായ ആരോഗ്യപ്രശ്നങ്ങളെത്തുടര്ന്ന് കുറേ ദിവസങ്ങളായി ആശുപത്രിയിൽ ചികിത്സയിലായിരുന്നു. പനി ബാധിച്ചു ആശുപത്രിയിൽ പ്രവേശിപ്പിച്ച ഗൗരിയമ്മയുടെ നില കുറച്ചു ദിവസങ്ങളായി അതീവഗുരുതരമയിരുന്നു.
