കൊവിഡ് പ്രതിരോധത്തിനായി കേന്ദ്ര-സംസ്ഥാന സർക്കാരുകൾ പുറപ്പെടുവിച്ചിരിക്കുന്ന നിർദ്ദേശങ്ങൾ പാലിച്ച് കുത്തിവെപ്പെടുക്കണമെന്നും രോഗ വ്യാപനം തടയുന്നതിനായി മാസ്ക് ധരിക്കൽ, സാമൂഹിക അകലം പാലിക്കൽ, സാനിറ്റൈസർ ഉപയോഗം തുടങ്ങിയവ ഉറപ്പാക്കണമെന്നും സർക്കുലറിൽ പറയുന്നു.
അതേസമയം, സ്വകാര്യ ആശുപത്രികളിലെ ചികിത്സാ നിരക്ക് നിശ്ചയിച്ച് സർക്കാർ രംഗത്തെത്തിയിരുന്നു. ചികിത്സാ നിരക്ക് സംബന്ധിച്ച് വിവാദം കനക്കവെയാണ് സർക്കാർ നടപടിയുമായി രംഗത്തെത്തിയത്. ജനറല്‍ വാര്‍ഡുകള്‍ക്ക് എല്ലാ ചെലവുകളും ഉള്‍പ്പെടെ ഒരുദിവസം 2645 രൂപ വരെ മാത്രമേ ഈടാക്കാവൂ എന്നാണ് വിജ്ഞാപനത്തിൽ പറയുന്നത്.
ജനറൽ വാർഡുകളിൽ രജിസ്‌ട്രേഷന്‍, കിടക്ക, നേഴ്‌സിങ് ചാര്‍ജ് തുടങ്ങിയവ അടക്കമുള്ളവ ഉള്‍പ്പെടെയാണ് ഒരുദിവസം 2645 രൂപ ഇടാക്കാൻ കഴിയുക. കൊവിഡ് രോഗികളുടെ ചികിത്സയ്ക്ക് അമിത നിരക്ക് ഈടാക്കുന്നതുമായി ബന്ധപ്പെട്ട കേസിൽ സർക്കാർ കോടതിയിൽ നൽകിയ റിപ്പോർട്ടിലാണ് ചികിത്സാ നിരക്ക് നിജപ്പെടുത്തിയതായി വ്യക്തമാക്കിയിട്ടുള്ളത്.
ഹൈ ഡിപ്പൻഡൻസി യൂണിറ്റ് (HDU) എൻഎബിഎച്ച് അക്രഡിറ്റേഷൻ ഇല്ലാത്ത ആശുപത്രികളിൽ ഒരു ദിവസത്തെ നിരക്ക് – 3795 രൂപ, എൻഎബിഎച്ച് അക്രഡിറ്റേഷൻ ഉള്ള ആശുപത്രികളിൽ 4175 രൂപയാണ് നിരക്ക്. ഐസിയുവിൽ എൻഎബിഎച്ച് അക്രഡിറ്റേഷൻ ഇല്ലാത്ത ആശുപത്രികളിൽ ഒരു ദിവസത്തെ നിരക്ക് – 7800 രൂപ, എൻഎബിഎച്ച് അക്രഡിറ്റേഷൻ ഉള്ള ആശുപത്രികളിൽ 8580 രൂപ. വെന്‍റിലേറ്ററോട് കൂടി ഐസിയു എൻഎബിഎച്ച് അക്രഡിറ്റേഷൻ ഇല്ലാത്ത ആശുപത്രികളിൽ ഒരു ദിവസത്തെ നിരക്ക് – 13800 രൂപ, എൻഎബിഎച്ച് അക്രഡിറ്റേഷൻ ഉള്ള ആശുപത്രികളിൽ 15180 രൂപ എന്നിങ്ങനെയാണെന്നും റിപ്പോർട്ട് വ്യക്തമാക്കുന്നു.
സിടി സ്‌കാൻ അടക്കമുള്ള പരിശോധനകള്‍ക്ക് അധിക ചാര്‍ജ് ഈടാക്കാം. ജനറല്‍ വാര്‍ഡില്‍ രണ്ട് പിപിഇ കിറ്റ് മാത്രമേ ഒരു രോഗിക്ക് ഉപയോഗിക്കാവൂ എന്നും ഐസിയുവില്‍ ആണെങ്കില്‍ അഞ്ച് പിപിഇ കിറ്റുകള്‍ വരെ ആകാമെന്നും വിജ്ഞാപനത്തിലുണ്ട്. ഇവയുടെ പരമാവധി വില്‍പന വിലയില്‍ കൂടുതല്‍ നിരക്ക് ഈടാക്കാന്‍ പാടില്ലെന്നും വിജ്ഞാപനം വ്യക്തമാക്കുന്നുണ്ട്.
