പ്രഥമ സൂപ്പർ ലീഗിന് ഇന്ന് പന്തുരുളും

കൊച്ചി: പ്രഥമ സൂപ്പർ ലീഗ് കേരള ഫുട്ബോളിന് ഇന്ന് തുടക്കം. ഫോർസ കൊച്ചി എഫ് സി ആദ്യ മത്സരത്തിൽ മലപ്പുറം എഫ് സിയെ നേരിടും. ജാക്വലിൻ ഫെർണാണ്ടസ് അടക്കമുളള താരനിര അണിനിരക്കുന്ന ഉദ്ഘാടന ചടങ്ങോടെയാണ് ആദ്യ സീസണിന് തുടക്കമാവുക. കലൂർ സ്റ്റേഡിയത്തിൽ വൈകിട്ട് ഏഴരയ്ക്കാണ് മത്സരം.

കേരള ഫുട്ബോളിനിത് ആഘോഷകാലമാണിത്. പുത്തൻ പ്രതീക്ഷയുടേയും. കരുത്തിൽ ഒപ്പത്തിനൊപ്പം പോന്ന ആറു ടീമുകൾ, എല്ലാ ടീമിനും വിദേശ പരിശീലകർ, പന്തു തട്ടാൻ ബ്രസീലിൽ നിന്നും സ്പെയിനിൽ നിന്നുമെല്ലാമെത്തുന്ന താരനിര, ഒപ്പം ഇന്ത്യൻ ഫുട്ബോളിലെ വമ്പൻമാർ. ഐഎസ്എല്ലിൽ ചെന്നൈയിൻ എഫ് സിക്ക് രണ്ടാം കിരീടം സമ്മാനിച്ച ഇംഗ്ലീഷ് കോച്ച് ജോൺ ഗ്രിഗറിയാണ് മലപ്പുറത്തിന് തന്ത്രമോതുന്നത്.

ഇന്ത്യയുടെ മുൻഡിഫൻഡർ അനസ് എടത്തൊടികയാണ് മലപ്പുറത്തിന്റെ നായകൻ. പോർച്ചുഗലിൽ നിന്നുളള മാരിയോ ലമോസാണ് ഫോർസ കൊച്ചി പരിശീലകൻ, ജോ പോൾ അഞ്ചേരി സഹ പരിശീലകനായുണ്ട്. ഇന്ത്യയുടെ മുൻഗോൾകീപ്പർ സുഭാശിഷ് റോയ് ചൗധരിയാണ് ക്യാപ്റ്റൻ. പ്രഥമ സീസണിന് വർണാഭമായ തുടക്കം കുറിക്കാൻ സംഘാടകരിറക്കുന്നത് താരനിര. ബോളിവുഡ് താരം ജാക്വലിൻ ഫെർണാണ്ടസും, ഡ്രമ്മർ ശിവമണിയുമെല്ലാം ഉദ്ഘാടനത്തിന് മിഴിവേകും.