തിരുവനന്തപുരം
രാജ്യത്ത് മൂന്നുമാസത്തിനുശേഷം സർവീസ് ആരംഭിക്കുന്ന വന്ദേഭാരത് സ്ലീപ്പറിന് 16 കോച്ച്. 823 ബെർത്താണ് ഉണ്ടാകുക. ദീർഘദൂര യാത്രക്കാരെ ലക്ഷ്യമിട്ടാണ് സർവീസ്. ഫസ്റ്റ് ക്ലാസ് എസിക്ക് ഒരുകോച്ചും 24 ബെർത്തും ഉണ്ടാകും. ടു ടയർ എസിക്ക് നാല് കോച്ചിലായി 188 ബെർത്തും 3 ടയർ എസിക്ക് 11 കോച്ചിലായി 611 ബെർത്തും ഉണ്ടാകും. ബംഗളൂരുവിൽ ഭാരത് എർത്ത് മൂവേഴ്സ് ലിമിറ്റഡ്(ബിഇഎംഎൽ) ആണ് ട്രെയിൻ നിർമിക്കുന്നത്.
സ്ലീപ്പറിന്റെ സവിശേഷതകൾ
● പരമാവധി വേഗം 160 കിലോമീറ്റർ
● ഭിന്നശേഷിക്കാർക്ക് സ്പെഷ്യൽ ബെർത്തും ടോയ്ലറ്റ് സൗകര്യവും
● അത്യാഹിതമുണ്ടായാൽ റിമോട്ട് ഉപയോഗിച്ച് തുറക്കാവുന്ന വാതിൽ
● ഫസ്റ്റ് ക്ലാസ് എസി കോച്ചിൽ ഷവറും ചൂടുവെള്ളവും
● റീഡിങ് ലൈറ്റും യുഎസ്ബി ചാർജിങ് സൗകര്യവും
● സൗകര്യപ്രദമായ ലഗേജ് റൂം
● മികച്ച യാത്രാസൗകര്യം
● ലോക്കോ പൈലറ്റുമാർക്ക് ശുചിമുറി
രാജ്യത്ത് ആദ്യമായാണ് ഒരു ട്രെയിനിൽ എൻജിൻ ഡ്രൈവർമാർക്ക് ശുചുമുറി സൗകര്യം നൽകുന്നത്. പതിറ്റാണ്ടുകളായി ജീവനക്കാരും സംഘടനകളും ആവശ്യം ഉന്നയിക്കുകയായിരുന്നു. പാസഞ്ചർ, എക്സ്പ്രസ്, ഗുഡ്സ് ട്രെയിനുകളിലും സൗകര്യം ഏർപ്പെടുത്തണമെന്നാണ് ഇവരുടെ ആവശ്യം.
