അമരാവതി > ആന്ധ്രാപ്രദേശിലെ എൻജനീയറിങ് കോളേജ് വനിതാ ഹോസ്റ്റൽ ശുചിമുറിയിൽ ഒളിക്യാമറകൾ. കൃഷ്ണ ജില്ലയിലെ ഗുഡ്വല്ലേരു എഞ്ചിനിയറിങ് കോളേജിലാണ് സംഭവം. ഒളിക്യാമറകൾ ഉപയോഗിച്ച് വിദ്യാർഥിനികളുടെ വീഡിയോകൾ രഹസ്യമായി പകർത്തുകയും ദൃശ്യങ്ങൾ കോളേജ് വിദ്യാർഥികൾക്ക് വിൽക്കുകയും ചെയ്തെന്ന് പൊലീസ് അറിയിച്ചു.
സംഭവത്തിൽ അവസാന വർഷ ബി. ടെക്ക് വിദ്യാർഥി വിജയ് കുമാറിനെ പൊലീസ് അറസ്റ്റ് ചെയ്തു. പ്രതിയുടെ ലാപ്ടോപും മൊബൈലും പൊലീസ് പിടിച്ചെടുത്തു. 300-ലധികം ചിത്രങ്ങളും വീഡിയോകളും ഒളിക്യാമറയിൽ പകർത്തിയിട്ടുണ്ടെന്നും പൊലീസ് പറഞ്ഞു.
വ്യാഴാഴ്ച വൈകീട്ട് വിദ്യാർഥിനികളുടെ ശുചിമുറിയിലെ ഒളിക്യാമറ അടർന്ന് വീണതോടെ ആണ് വിഷയം പുറത്തറിയുന്നത്. വ്യാഴാഴ്ച വൈകീട്ട് മുതൽ വിദ്യാർഥിനികളും പ്രദേശവാസികളും പ്രക്ഷോഭപത്തിലാണ്.
