ശ്രീനഗർ > ജമ്മു കശ്മീരിൽ ഭീകരരുമായുണ്ടായ ഏറ്റുമുട്ടലിൽ സൈനികന് വീരമൃത്യു. 48 രാഷ്ട്രീയ റൈഫിൾസിലെ ക്യാപ്റ്റൻ ദീപക് സിങ്ങാണ് മരണമടഞ്ഞത്. ദോഡ ജില്ലയിലെ അസ്സാർ ഏരിയയിൽ ബുധൻ രാവിലെയായിരുന്നു സംഭവം. ആക്രമണത്തിൽ പ്രദേശവാസിക്കും പരിക്കേറ്റു. ശിവ്ഗഢ്–അസർ മേഖലയിലെ ഒളിച്ചിരിക്കുന്ന ഭീകരരെ കണ്ടെത്താനായി നടന്ന തിരച്ചിലിനിടെയാണ് ഏറ്റുമുട്ടലുണ്ടായത്. 4 ഭീരകർ സൈനികർക്ക് നേരെ വെടിയുതിർക്കുകയായിരുന്നു. മേഖലയിൽ ഭീകരർ ഒളിച്ചിരിക്കുന്നുവെന്ന വിവരത്തെത്തുടർന്നു ചൊവ്വാഴ്ച വൈകിട്ടോടെ തിരച്ചിലിനു സൈന്യം ഇറങ്ങുകയായിരുന്നു. ഭീകരരെ സൈന്യം വധിച്ചതായും വിവരമുണ്ട്.
ഉധംപൂർ ജില്ലയിലെ പട്നിടോപ്പിനടുത്തുള്ള വനത്തിൽ സുരക്ഷാ സേനയും ഭീകരരും തമ്മിൽ വെടിവയ്പ്പ് നടന്നിരുന്നു. ഇതിനു ശേഷമാണ് ഭീകരർ ദോഡയിലേക്ക് കടന്നതെന്ന് സൈന്യം പറഞ്ഞു. സംഭവസ്ഥലത്ത് നിന്ന് രക്തം പുരണ്ട ബാഗുകളും ആയുധങ്ങളും കണ്ടെത്തിയതായി ഉദ്യോഗസ്ഥർ പറഞ്ഞു.
