മേപ്പാടി > വയനാട് ദുരന്തബാധിത പ്രദേശം സന്ദര്ശിച്ച കേന്ദ്ര സംഘത്തോട് അടിയന്തര പുനരധിവാസത്തിന് 2000 കോടി ആവശ്യപ്പെട്ടതായി മന്ത്രിസഭാ ഉപസമിതി അംഗങ്ങളായ മന്ത്രി പി എ മുഹമ്മദ് റിയാസ്, എ.കെ. ശശീന്ദ്രന് എന്നിവര് വാര്ത്താ സമ്മേളനത്തില് അറിയിച്ചു. ദുരിതാശ്വാസ ക്യാമ്പുകളിലുള്ളവരെ വീടുകളിലേക്ക് മാറ്റി പാര്പ്പിക്കുന്നതിനുള്ള നടപടി ഉടന് ആരംഭിക്കാനും മന്ത്രിസഭാ ഉപസമിതിയിൽ തീരുമാനമായി.
ദുരന്തബാധിതരുടെ വായ്പാ തിരിച്ചടവില് ഇളവ് പ്രഖ്യാപിക്കണമെന്നതുള്പ്പെടെയുള്ള വിഷയങ്ങള് കേന്ദ്ര സംഘത്തിന്റെ ശ്രദ്ധയില്പ്പെടുത്തിയെന്നും ശുചീകരണ പ്രവര്ത്തനങ്ങള് ഉടന് ആരംഭിക്കുമെന്നും മന്ത്രിമാർ അറിയിച്ചു. കുറഞ്ഞത് 90 ദിവസം ശുചീകരണ പ്രവർത്തനങ്ങൾക്ക് ആവശ്യമായി വരും. ദുരന്ത ബാധിതര്ക്ക് സമാശ്വാസ തുക അടിയന്തരമായി നല്കേണ്ടതുണ്ടെന്നും നിലവില് ക്യാമ്പുകള് തുടരുമെന്നും മന്ത്രിമാർ അറിയിച്ചു.
സര്ക്കാര് ക്വാര്ട്ടേഴ്സുകള് ഉള്പ്പെടെ 125 ഓളം വീടുകള് ദുരന്തബാധിതരുടെ താമസത്തിനായി കണ്ടെത്തിയിട്ടുണ്ട്. ഉടന് താമസമാക്കാന് കഴിയുംവിധത്തില് ഇവയില് പലതും തയ്യാറാണ്. ജില്ലാ കലക്ടറുടെ നേതൃത്വത്തില് പരിശോധന പൂര്ത്തിയാക്കിയാലുടന് താമസത്തിനായി വീടുകൾ നല്കും. ആവശ്യമായ ഫര്ണിച്ചറുകളും ഗൃഹോപകരണങ്ങളും ലഭ്യമാക്കുന്നതിനായി ഇടപെടുന്നതിന് ജില്ലാ കലക്ടറോട് ആവശ്യപ്പെട്ടതായും മന്ത്രി പി എ മുഹമ്മദ് റിയാസ് അറിയിച്ചു.
