‘സഞ്ജു ബാറ്റിങ് വെടിക്കെട്ട് തീർക്കും, നമ്മൾ ലോകകപ്പ് ജയിക്കും’; മനസ്സ് നിറഞ്ഞനുഗ്രഹിക്കുന്ന ആളെ കണ്ടോ?

എതിരാളികളുടെ കളത്തിൽ ചെന്ന് മുതിർന്നവരുടെ പോലും സ്നേഹവും ബഹുമാനവും പിടിച്ചുപറ്റുന്ന മലയാളികളുടെ പ്രിയതാരം സഞ്ജു സാംസണിന്റെ വീഡിയോ സോഷ്യൽ മീഡിയയുടെ ഹൃദയം കീഴടക്കുന്നു. ഹൈദരാബാദിലെ പിച്ച് ക്യൂറേറ്ററായ മദ്ധ്യവയസ്ക്കൻ മലയാളി താരത്തെ മനസ്സ് നിറഞ്ഞനുഗ്രഹിക്കുന്നതും വീഡിയോ രാജസ്ഥാൻ റോയൽ‌സാണ് പങ്കുവച്ചത്. ഹൈദാരാബാദിലെ ഉപ്പൽ സ്റ്റേഡിയത്തിലെ പ്രായം ചെന്നൊരു പിച്ച് ക്യൂറേറ്റർ സഞ്ജുവിന് ആശംസകൾ നേരുന്ന വീഡിയോ നിമിഷനേരം കൊണ്ടാണ് വൈറലായത്.

വ്യാഴാഴ്ച കൂറ്റനടിക്കാരായ സൺറൈസേഴ്സ് ഹൈദരാബാദുമായാണ് സഞ്ജുവിന്റെ രാജസ്ഥാൻ റോയൽസ് ഏറ്റുമുട്ടുന്നത്. സൺറൈസേഴ്സിന്റെ ഹോം ഗ്രൗണ്ടായ ഉപ്പൽ സ്റ്റേഡിയത്തിൽ വ്യാഴാഴ്ച വൈകിട്ട് 7.30നാണ് രാജസ്ഥാന്റെ അടുത്ത മത്സരം. ഐപിഎല്ലിൽ 9 മത്സരങ്ങളിൽ നിന്ന് എട്ട് വിജയവും 16 പോയിന്റുമായി ഒന്നാം സ്ഥാനത്താണ് സഞ്ജുവിന്റെ രാജസ്ഥാൻ ഇപ്പോഴുള്ളത്.

ക്യൂറേറ്ററെ മലയാളി സൂപ്പർതാരം ബഹുമാനത്തോടെ കെട്ടിപ്പിടിക്കുന്നതും കൈകളിൽ പിടിച്ചു ആശീർവാദങ്ങളും അനുഗ്രഹങ്ങളും നേടുന്നതും വീഡിയോയിൽ കാണാം. ‘രാജ്യത്തിന് വേണ്ടി കളിക്കണം. ബാറ്റുകൊണ്ട് നിങ്ങളത് ചെയ്യുമെന്ന് എനിക്കറിയാം. നിങ്ങൾ വെടിക്കെട്ട് തീർക്കും. നമ്മുടെ ടീം ഗംഭീരമായി തിരിച്ചുവരും. എന്റെ പ്രാർത്ഥനയും അനുഗ്രഹവും നിങ്ങൾക്കൊപ്പം എന്നുമുണ്ടാവും. എനിക്ക് ഒരുപാട് സന്തോഷമുണ്ട്. നിങ്ങൾ തീർച്ചയായും ലോകകപ്പ് വിജയിക്കും,” ക്യൂറേറ്റർ പറഞ്ഞു. ഗ്രൗണ്ട് സ്റ്റാഫുകളോടൊപ്പം നിന്ന് സഞ്ജു ഫോട്ടോ എടുക്കുന്നതും വീഡിയോയിൽ കാണാം.

View this post on Instagram
A post shared by Rajasthan Royals (@rajasthanroyals)

‘തൂമണി പോൽ പുഞ്ചിരി പുഞ്ചിരി’ എന്ന മലയാള ഗാനവും സന്ദർഭത്തിന് അനുയോജ്യമായ വിധത്തിൽ രാജസ്ഥാൻ ഈ വീഡിയോയിൽ ഉൾപ്പെടുത്തിയിട്ടുണ്ട്. അന്താരാഷ്ട്ര തലത്തിൽ പോലും മലയാളികൾക്ക് സൽപ്പേര് വാങ്ങിച്ചു തരികയാണ് ഈ തിരുവനന്തപുരത്തുകാരൻ. സഞ്ജു സാംസൺ മലയാളികളുടെ മാത്രമല്ല, ഈ രാജ്യത്തിന്റെ ഒന്നടങ്കം വികാരമായി മാറിയെന്നാണ് ഒരു ആരാധകൻ ഈ വീഡിയോയ്ക്ക് താഴെ കുറിച്ചിരിക്കുന്നത്.