സഞ്ജുവിനെ കുടിപ്പിച്ച് കിടത്തുമോ ചഹാർ; സമന്ത മുതൽ പ്രീതി സിന്റ വരെ; ഞെട്ടിച്ച് ഐപിഎൽ പരസ്യം

ഐപിഎൽ സീസൺ തുടങ്ങാനിരിക്കെ ഡ്രീം ഇലവൻ ഒരുക്കിയ പരസ്യ ചിത്രം ശ്രദ്ധേയമാകുന്നു. പതിവു പോലെ ബോളിവുഡ്, ക്രിക്കറ്റ് താരങ്ങളുടെ സംഗമ വേദി കൂടിയായി ഈ പരസ്യം മാറുകയാണ്. സീനിയർ ക്രിക്കറ്റ് താരങ്ങളായ മൊഹീന്ദർ അമർനാഥ്, എസ്. ശ്രീകാന്ത് എന്നിവരും കുട്ടി ക്രിക്കറ്റിന്റെ ഇന്ത്യൻ പതിപ്പിന്റെ ആവേശം ചർച്ച ചെയ്യാനെത്തുന്നുണ്ട്.

രോഹിത് ശർമ്മ, ഹാർദിക് പാണ്ഡ്യ, ഇഷാൻ കിഷൻ എന്നിവരാണ് മുംബൈ ഇന്ത്യൻസിനെ പ്രതിനിധീകരിച്ച് പ്രത്യക്ഷപ്പെടുന്നത്. രോഹിത്തിനെ ടീം ബസിൽ കയറുന്നതിൽ നിന്ന് തടയുന്ന റിഷഭ് പന്തിനെ അവതരിപ്പിച്ചാണ് കൊമേഴ്സ്യൽ ചിത്രം തുടങ്ങുന്നത്. ഹാർദിക്-ക്രുണാൽ പാണ്ഡ്യ സഹോദരങ്ങളുടെ വാക്പോരും വേറിട്ട അനുഭവമാണ് നൽകുന്നത്.

രാജസ്ഥാൻ ക്യാപ്ടനും മലയാളി താരവുമായ സഞ്ജു സാംസണെ ജ്യൂസ് കുടിപ്പിക്കാനെത്തുന്ന പഞ്ചാബിന്റെ സ്പിന്നർ രാഹുൽ ചഹാറിനേയും കാണാം. രാഹുലിന്റ അമിതമായ സ്നേഹപ്രകടനം സംശയദൃഷ്ടിയോടെയാണ് സഞ്ജു നോക്കി കാണുന്നത്. ശ്രേയസ് അയ്യരെ ചൊറിയുന്ന മുംബൈ താരങ്ങളേയും കാണാം.

രോഹിത്തിനേയും കൂട്ടരേയും പാട്ടുപാടി വെല്ലുവിളിക്കുന്ന പഞ്ചാബി ഗായകൻ ദലേർ മൊഹന്തിയേയും കാണാം. താരസുന്ദരികളായ പ്രീതി സിന്റയുടേയും സാമന്തയുടേയും കുശുമ്പ് പറച്ചിലുകളും പരസ്യത്തെ ആവേശകരമാക്കുന്നുണ്ട്. കൊൽക്കത്ത നായകൻ ശ്രേയസ് അയ്യരുടെ കൈകൾ ഞെരിക്കുന്ന മുംബൈ ഫാനായി സുനിൽ ഷെട്ടിയും പ്രത്യക്ഷപ്പെടുന്നുണ്ട്.

Not sure about the goals, but for sure @RajasthanRoyals are doing everything to have a great season Supriya Ji 😊 #TeamSeBadaKuchNahi #Ad #Dream11 #RajasthanRoyals @Dream11 pic.twitter.com/AOxraD7oef
— Ashwin 🇮🇳 (@ashwinravi99) March 15, 2024

1.55 മിനിറ്റ് ദൈർഘ്യമുള്ള വീഡിയോ ആണ് സമൂഹ മാധ്യമങ്ങളിലൂടെ പുറത്തുവന്നത്. രാജസ്ഥാൻ സ്പിന്നർ രവിചന്ദ്രൻ അശ്വിനാണ് ഈ വീഡിയോ എക്സിൽ പങ്കുവച്ചിരിക്കുന്നത്.