ഐപിഎല്ലിലെ ബാറ്റിങ് ശൈലി മാറുമോ? ഗെയിം പ്ലാൻ വെളിപ്പെടുത്തി സഞ്ജു സാംസണ്‍

ആദ്യ പന്തില്‍ തന്നെ സിക്സർ അടിക്കാനാണ് താൻ ആഗ്രഹിക്കുന്നതെന്ന് മലയാളികളുടെ പ്രിയ ക്രിക്കറ്റ് താരം സഞ്ജു സാംസണ്‍. ഇന്ത്യന്‍ പ്രീമിയര്‍ ലീഗിന്റെ 2024 സീസണ്‍ ആരംഭിക്കാന്‍ ദിവസങ്ങള്‍ മാത്രം ബാക്കിയുള്ളപ്പോഴാണ് രാജസ്ഥാന്‍ റോയല്‍സിന്റെ ക്യാപ്റ്റന്‍ തന്റെ ബാറ്റിങ് ശൈലിയെ കുറിച്ച് മനസ് തുറന്നത്. ഐപിഎല്ലിന്‍റെ പുതിയ സീസണിലും ആദ്യം മുതലേ ആക്രമിച്ച് കളിക്കുമെന്നും അദ്ദേഹം പറഞ്ഞു. സ്റ്റാര്‍ സ്‌പോര്‍ട്‌സിന് നല്‍കിയ അഭിമുഖത്തില്‍ സംസാരിക്കുകയായിരുന്നു താരം.

“കളിക്കളത്തില്‍ എന്റേതായ ഒരു ബാറ്റിങ് ശൈലി സൃഷ്ടിക്കാനാണ് ഞാന്‍ ആഗ്രഹിക്കുന്നത്. അത് ആദ്യ പന്താണെങ്കില്‍ പോലും ഞാന്‍ സിക്സര്‍ അടിക്കണമെന്നാണ് എന്റെ ആഗ്രഹം. എന്റെ ചിന്താഗതിയില്‍ വന്ന മാറ്റമാണിത്. വ്യത്യസ്തമായ എന്തെങ്കിലും ചെയ്യണമെന്നാണ് ഞാന്‍ ആഗ്രഹിക്കുന്നത്. ഒരു സിക്സ് അടിക്കാന്‍ എന്തിന് പത്ത് പന്തുകള്‍ വരെ കാത്തിരിക്കണം?,” സഞ്ജു ചോദിച്ചു.

ക്യാപ്റ്റനെന്ന നിലയിൽ താരങ്ങളോട് അതാത് സമയങ്ങളിൽ വേണ്ടത് ചോദിച്ച് വാങ്ങാറുണ്ടെന്നും സഞ്ജു പറഞ്ഞു. “ചിലപ്പോൾ മെച്ചപ്പെട്ട പ്രകടനം നടത്താൻ കളിക്കാരോട് ആ രീതിയിൽ സംസാരിക്കേണ്ടി വരും. അതിനായി ആദ്യം ആത്മവിശ്വാസം നേടുകയാണ് ആദ്യം വേണ്ടത്. ഐപിഎല്ലിൽ കളിച്ച് പരിചയമുള്ളതിനാൽ ഇവിടെ തിളങ്ങാനാകുമെന്ന് എനിക്ക് ആത്മവിശ്വാസമുണ്ട്. ഒരു ഇതിഹാസമായ അശ്വിൻ ഭായിയോട് ഈ റോളാണ് നിർവഹിക്കേണ്ടത് പറയുമ്പോൾ, ടീമിന് എന്താണ് വേണ്ടതെന്ന് കൃത്യമായി മനസിലാക്കി കൊടുക്കുകയാണ് ചെയ്യാറുള്ളത്. ആശയവിനിമയത്തിലെ സുതാര്യത പ്രധാനമാണ്. ഒരു യുവതാരമെന്ന നിലയിൽ ടീമിനെ നിയിക്കുമ്പോൾ ഇതെല്ലാം ഞാൻ ശ്രദ്ധിക്കാറുണ്ട്,” സഞ്ജു കൂട്ടിച്ചേർത്തു.

Get ready. He’s back 🔥💗 pic.twitter.com/3at8KQgdhH
— Rajasthan Royals (@rajasthanroyals) March 3, 2024

മാര്‍ച്ച് 22നാണ് ഐപിഎല്‍ 2024 സീസണ്‍ ആരംഭിക്കുന്നത്. ചെന്നൈ ചെപ്പോക്ക് സ്‌റ്റേഡിയത്തില്‍ നടക്കുന്ന ഉദ്ഘാടന മത്സരത്തില്‍ നിലവിലെ റണ്ണറപ്പായ ചെന്നൈ സൂപ്പര്‍ കിങ്‌സ് റോയല്‍ ചലഞ്ചേഴ്‌സ് ബാംഗ്ലൂരിനെ നേരിടും. മാര്‍ച്ച് 24ന് ലഖ്‌നൗ സൂപ്പര്‍ ജയന്റ്‌സിനെതിരെ ആണ് സഞ്ജു നയിക്കുന്ന രാജസ്ഥാന്‍ റോയല്‍സിന്റെ ആദ്യ മത്സരം.